Proyecto di renobacion y expansion ImSan ta operacional pa september 2019

ORANJESTAD – E proyecto di renobacion y expansion di ImSan ta operacional pa september di aña 2019. Asina un comunicado di ministerio di minister Dangui Oduber (Salud) ta bisa.  Diaranson atardi   Oduber a haci un bishita na ImSan, unda e la haya presentacion riba e proyecto di renobacion y expansion di ImSan. E presentacion a wordo haci pa” Baptist Health International”.

CONSTRUCCION

E parti di construccion ya caba ta andando desde Juli di e aña aki y tur cos ta canando na schedule. Awor nos ta den e fase di constuccion y tambe busca e ekiponan medico y pa otro aña na september ImSan mester ta operando segun e mandatario. Ora cu e proyecto aki ta cla ImSan lo tin 3 kamber di operacion pa duna servicio di operacion ambulatorio. Tambe ImSan lo conoce servicio di terapia di radiologia riba e mihor aparato riba mercado, es decir un cuido medico di alta calidad. Den futuro na Aruba mes por trata pashentnan cu ta wordo diagnostica cu cancer y AZV no mester manda e pashent Hulanda of Colombia mas. 

ACREDITACION

“Baptist Health International” ta zorg cu via di “Joint Commission International Accreditation” (JCI) ImSan lo wordo acredita internacionalmente. Aruba lo bira e di 3 pais den Caribe cu tin un instituto cu ta acredita pa JCI, Colombia y Hulanda mes tin 4 instituto cada uno. E acreditacion aki ta haci posibel tambe pa Aruba bay den e direccion di turismo medico, ya cu e seguronan medico internacional ta traha cu institutonan cu ta acredita pa JCI asina   Oduber a duna di conoce.

SKEPTICO

Oduber tabata hopi skeptico di con e proyecto ta canando, esaki ta pa motibo cu e mandatario no kier pa e proyecto aki bira un repiticion di Horacio Oduber Hospital. HOH tabata tin hopi erornan cu a tuma lugar y nuin hende kier para responsabel. Tur esaki a conduci na un “budget overrun” di mas di 100 miyon florin. Nan a mustra minister riba e structura di e proyecto unda cu tur placa pa material, ekipo, etcetera lo mester wordo aproba pa ImSan. Cu otro palabra ImSan no ta para responsabel pa algo cu no ta aproba.