FMSA sorprendi ariba actuacion di operador di Citgo Caya Grandi

ORANJESTAD -Diaranson atardi FMSA a wordo sorprendi pa un conferencia di prensa cu a tuma lugar na Citgo Caya Grandi, na unda cu e operador di e stacion Sra. Mariela van den Bosch a informa comunidad di Aruba cu e ta obliga di sera tanki number dos di su stacion pa motibo di negligencia di FMSA. Asina e compania a informa pa medio di un comunicado diaranson anochi. Segun e comunicado, FMSA ta mustra di lamenta dicho proceder y sigur FMSA ta decepciona cu e acion tuma mirando e hecho cu e referente tanki dos tin casi 20 an?a den operacion, sin tabata tin problema cu e operacion cu e operador anterior. Desde 2013, Sra. van den Bosch ta e operador nobo y tampoco no a laga sa cu tin problema mientras cu Valero ta don?o di VMSA te cu 2016. Ta ultimo dos an?a aki, despues cu FMSA a bira un compania estatal di Aruba cu diferente kehonan ta bin dilanti.

TANKI DOS

Pa ta mas specifico cu e tanki dos aki, segun FMSA durante un yenamento di e tanki en cuestion door di FMSA su truck di gasolin, por a observa cu e producto gasolin a sali na un di e pompnan. Ora cu FMSA a hasi investigacion a bin resulta cu e operador actual no ta hasi e operacion manera debe ser cu e operador anterior si tabata hasi. E procedura aki a ser poni ariba papel y cu tin actualmente aprobacion di DTI cu ta garantisa un operacion safe di e stacion di gasolin. FMSA y GERMO (Citgo Caya Grandi) a bai di acuerdo pa hasi uzo di e procedura aki desde 24 di Juli 2018 segun e comunicado, y hasiendo uzo di e procedura aki e partidonan a sa di opera e stacion sin ningun problema desde cu e la wordo implementa. Asina e comunicado ta sigui bisa.

VEREDICTO DEN CORTE 

Segun FMSA, partidonan emberdad ta pendiente un veredicto di corte. Ta importante pa menciona cu e sen?ora no ta respeta e kortgeding cu e mes a cuminsa y cu lo tin sentencia dia 20 di December venidero. Actuando manera eta hasi actualmente, Sra. Van den Bosch ta dicidi y ta determina sin ningun argumento tecnico valido pa stop e uzo di tanki number dos. Segun FMSA, e desishon di Sra. Van den Bosch ta mustra di no tin ningun otro intenshon cu ta pa desacredita FMSA y tambe propiedad di stacion di gasolin Caya Grandi, pa asina por cumpra e stacion di gasolin, patrimonio di e pueblo di Aruba, na un prijs irealistico. Por ultimo, FMSA ta sigura, cu nan tin un trayectoria di decadanan den operacion y distribucion di productonan petrolero na Aruba, nunca lo hasi un operacion unsafe cu lo pone bida di hende na risico. “Seguridad di clientela, empleadonan di e stacion di gasolin, esnan den sercania y pueblo di Aruba en general, semper tabata y lo keda na prome lugar” FMSA su comunicado ta finalisa bisando. NOTA: NoticiaCla a ricibi invitacion pa conferencia di prensa e operador, pero no por tabata presente y como tal no tabatin e version di nan pa presenta ainda.