Edificio di DIMAS/DAO ta keda sera por lo pronto

ORANJESTAD – Decision a cay conhuntamente cu DOW pa mantene e edificio nobo di DIMAS (Departamento di Integracion, Maneho y Admision di Stranhero) y DAO (Department Arbeids Onderzoek) cera te cu proximo aviso. No ta conoci si esaki ta resultado di e reunion di diaranson merdia. DOW lo tuma e edificio na Paardenbaaistraat over pa termina partinan di mantencion. Lo entrega esaki bek na momento cu nan dicidi cu e edificio ta apto pa trahadonan y tambe clientenan di DIMAS por drenta atrobe pa eherce nan trabou y haci tramitenan necesario na DIMAS.

E resultadonan di e diferente testnan, haci pa DTI, WEB, y Hygienische dienst cu a ser analisa pa Dr Salazar di Departamento di Salud Publico conhuntamente cu experto riba tereno di ARBO di SVB, a conclui cu locual a ser midi tanto na gas, den aire y den awa na e edificio na Paardenbaaistraat ta cay dentro di normanan cu ta considera aceptabel internacionalmente.

DIMAS hunto cu DOW y Infrateam ta trahando ariba un plan B, cual ta alocacion di e servicio na un otro localidad. Ta pidi tur cliente pa comprension y pasenshi considerando e desaroyonan nobo. Ta spera cu pronto - den curso di e siman aki ainda - di por duna mas claridad y ta mas concreto unda e clientennan mester acudi pa servicio y con e proceso lo bay.‎ DIMAS ta pidi tur su clientenan pa tene bon cuenta cu esaki y ta pidi alabes disculpa pa cualkier inconveniencia cu esaki lo por trece cu ne.

Tabata mas prome mainta, cu NoticiaCla.com a raporta cu un reunion diaranson merdia tin cu determina e proximo paso relaciona cu e situacion di e edificio . “E situacion ta status quo. Despues di un reunion awe merdia 1:30pm lo tin mas informacion”, directora di DIMAS, Kathy Ruiz Paskel a bisa NoticiaCla.com diaranson mainta. Segun Ruiz, tabatin basta cliente cu a bin pa servicio, y a haya e edificio sera. “Esaki ta pone cu hopi cliente ta den incertidumbre” Ruiz a sigui bisa. E clientenan enves di haya e edificio habri, a haya nan confronta cu un papel riba porta cu ta bisa cu e edificio ta “cera te proximo aviso”. Ruiz ta spera cu tin claridad awe, despues di e reunion di merdia.

OPOSICION KIER CLARIDAD

Mientrastanto diaranson mainta parlamentario pa partido MEP, Dangui Oduber a sigura cu na nomber di partido, lo manda un carta cu pregunta pa e minister encarga, Benny Sevinger, pa haya clarificacion. “Con por ta posibel cu e edificio ta sera pa 3 siman caba” Oduber a puntra. “Con ta posibel cu ta bisa cu lo keur e edificio af den apenas 5 aña”. Segun Oduber, tin mucho pregunta, mientras cu e minister encarga no ta dunando cara pa e problema. E kier sa entre otro, si ta bay re aloca e trahadonan pa otro edificio, kico ta bay para cu e servicio pa e clientenan, y mucho mas.

E SITUACION

E edificio, manera cu NoticiaCla.com a raporta y anticipa diamars, a lanta sera atrobe diaranson mainta. Esaki, siendo cu e lo mester a habri pa publico atrobe. Segun Paskel, no a keda cla cu e trabounan y a haya mas asunto cu tin cu bay atende cune aworaki. Mas e no por a bisa. Loke esaki ta nifica segun Ruiz, ta cu por lo pronto e edificio lo keda sera, te ora cu keda cla cu e trabounan di investigacion. No ta descarta cu lo tin cu muda e personal di DIMAS tambe (manera cu a anuncia anteriormente pa e trahadonan di labor (DAO)). E periodo pa cual esaki lo tin cu sosode, no ta conoci pa Ruiz.

Tabata siman pasa ainda cu e directora di DIMAS a indica cu contrario na e trahadonan di DAO (dept di labor), esnan di DIMAS, lo no mester a muda of traha for di cas. Esaki segun directora di DIMAS, Kathy Paskel a sigura NoticiaCla.com. “Mi por informabo cu DIMAS lo no muda, considerando e resultadonan y conseho ricibi” Ruiz-Paskel a bisa NoticiaCla.com na e occasion ey. Minister di labor, Paul Croes a bisa NoticiaCla.com sinembargo cu e trahadonan di DAO, si lo muda pa otro lugarnan y algun lo traha te hasta for di nan cas. DIMAS a avisa cu nan tin cambio atrobe pa cu e situacion di cita di permiso. Algo cu awor un biaha mas ta keda cambia. E oficina mes lo mester a habri bek diaranson mainta 8:30am, pero ta sera te proximo aviso. NOTA. foto ta uno di archivo di un siman pasa ora cu trahadonan a pone trabou abou.