Gobierno mester paga Odinsa 1 miyon pa destaho Watty Vos Blvd

ORANJESTAD – Gobierno di Aruba mester paga e compania colombiano di construccion Odinsa 1 miyon florin awor. Minister di infrastructura Otmar Oduber a confirma esaki pa NoticiaCla diaranson atardi. E pago ta parti di un contracto cu gobierno anterior lo a firma cu ta duna nan (Odinsa) e derecho di cobra, si nan perde e destaho publico pa e proyecto di Watty Vos Boulevard. E destaho aki a wordo gana pa e compania Mota Engil, y pa esaki, Odinsa mester haya un miyon florin. Placa cu segun Oduber, gobierno no tin aworaki. E cobransa cu Oduber ta referi na dje awor ta un ‘recordatorio’ di un prome carta di cobransa di april di 2017. 

E PROME PAGO

Segun Oduber, e prome cobransa gobierno anterior a ricibi dia 6 di april 2017 y tabata pa e ministernan di e tempo ey Benny Sevinger (Infrastructura) y Angel Bermudez (Finanzas) . Pero nan (e ex gobernantenan) no a reacciona e tempo ey. Como tal, nan abogado local awor a manda un recordatorio pa gobierno paga e suma habri di 1 miyon florin, ‘pasobra Odinsa no a gana e destaho’. Segun Oduber, e ta parti di e palabracion haci entre Odinsa cu e gobierno anterior, cu lo a bay di acuerdo cu ne. Segun Oduber, no ta conoci con lo bay paga esaki y ta evaluando alternativanan. No ta conoci kico e deadline ta pa e pago, ni si tin multa adicional si gobierno no cumpli cu e pago aki. Hecho ta cu gobierno su man ta parse mara y cu mester paga esaki. 

ODINSA

Odinsa ta e compania Colombiano cu tabata encarga cu e proyecto di Green Corridor, y cu a purba haya e contracto tambe pa esun di Watty Vos Boulevard. Pero den esun ey nan no a logra, y e contracto a bay pa Mota Engil. Engil mientrastanto no ta cumpliendo cu varios parti pa cual recientemente el a haya un multa miyonario pa incumplimento riba e.o. e parti di comienso di e proyecto cu nan ta responsabel pe, esta  Watty Vos Boulevard. Nan tin te fin di otro aña pa completa e proyecto aki.