Sospechoso di intento di asesinato deteni

ORANJESTAD – Polis a detene e sospechoso di intento di asesinato di fin di siman cu a pasa. Manera ta conoci, den fin di siman a tuma luga un caso lamentabel di intento di asesinato, den cual a propina e ex catochero Paul Vilt cu cuchiu y lag'e seriamente herida atras. Recherchenan di Oranjestad a start cu un investigacion mesora na e sitio. Durante e investigacion tactico di polis, a uza diferente forma pa por a yega na informacion clave relaciona cu e caso serio aki. Testigonan a duna un bon man den e proceso pa por a conduci e caso den un direccion satisfactorio. Diamars atardi, recherchenan a yega asina leu den e investigacion, cu a bay over na detencion di e sospechoso di inicial L.D.M.J., naci na Aruba dia 23 di augustus 1990. Cuerpo Policial Aruba ta sigui cu e investigacion aki, den un esfuerso pa soluciona e caso y yega na e sospechoso principal. No por descarta cu lo tin mas detencion den cuadro di e mesun investigacion aki.