Ministernan a ‘hint’ cu posibel retiro di gabinete Eman II

ORANJESTAD – Retiro di Gabinete Mike Eman II ta un opcion diabierna mainta ora cu premier Eman caba reuni cu gobernador Refunjol. Esey a sali afo diahuebs anochi durante e programa Mesa Rondo na ATV unda cu e invitadonan tabata ministernan Sevinger y Yrausquin. Durante e programa ey, minister Benny Sevinger a rechasa e pensamento ey indicando cu un retiro no ta yuda na nada. Pero mes momento ora cu a bolbe presenta e posibilidad ey, nan a mustra cu ‘e ora no ta resta nada mas y cos a caba’. Di otro banda, e siguiente paso (manera cu NoticiaCla a raporta diahuebs den dia caba) despues di reuni cu gobernador diabierna mainta, ta cu lo informa Nacionnan Uni di e caso di gobernador y keha Gobierno di Reino y gobernador. Un proposicion mas na fabor pa Sevinger.

Un otro indicacion di posibel retiro, tabata e declaracion di Yrausquin, momento cu el a splica e nificacion di un aanwijzing lo ta pa Aruba. Segun Yrausquin, si Aruba haya un aanwijzing, gobernador di Aruba lo mester dicidi e ora su so, kico pa haci cu e presupuesto, ki medida pa tuma. De hecho, ta gobierno di Reino lo dicidi y sinta riba e stul, y gabinete Eman II lo no tin nada mas pa bisa. Segun indicacion di Yrausquin, e gabinete lo por a wel retira e ora.

For di den dia, tabatin informacionnan ta circula rond cu e idea di premier Eman ta cu si e no logra keda cla cu gobernador, no ta rest’e nada mas cu entrega retiro di su gabinete mesora, ya cu e no por sigui funciona asina. Loke tambe tabata core rond ta cu ya caba premier Eman a formula e carta di retiro den forma di concepto, y cu esaki te hasta tabata circula caba. NoticiaCla a compronde di algun persona cu tin den cierto seno cu a te hasta wak e carta aki, pa straño cu e por zona.

Kedando sinembargo riba hechos concretos, pa e reunion di Conseho di Minister di Reino hopi anticipa na Hulanda di diabierna, NoticiaCla a compronde cu Hulanda tin varios scenario prepara. Pa cada scenario, Hulanda lo tin un relato prepara riba papel pa presenta. Entre nan, si e decision cay cu Aruba ta haya un aanwijzing, y e otro cu si Aruba (bolbe) scapa di un aanwijzing. Decision ta cay diabierna, un biaha mas kico ta bira e futuro di nos pais.