Awor por mira Corsou via Google Street View tambe

WILLEMSTAD –   Desde dialuna,  e isla di Corsou tambe ta visible via e medio Google Street View, y por navega pa localidadnan specific. Pues esaki kier men cu via bo computer bo por mira practicamente full Corsou di cerca, incluyendo cayanan y barionan. E intencion ta pa cierto areanan turistico di Corsou keda visible di cerca, usando e instrument aki.  

GOOGLE

Google mas tempran e aña aki a traha hunto cu oficina di turismo di Corsou, pa pone e isla ‘riba mapa internacional’. Usando e fenomeno ‘street view trekker’ a logra filma gran parti di Corsou, usando apenas un ‘rugtas’ den cual ta sali un camera special. Prome minister Eugene Rhuggenaath a anuncia esaki cu alegria. “Door di laga tur hende wak nos cayanan, tur hende por haya un sentido di union y diversidad cu ta haci nos isla asina unico” e mandatario a bisa. 

CRITICA

Di otro banda, el a crea critica pa loke ta posibel mal uso di e instrument aki, citando violacion di privavidad di propiedad y cas.  Pero e criticanan aki ‘ainda’ tabata limita. Ta e intencion y speransa cu ta usa esaki mas bien pa finnan turistico y cu ta haci e atraccion aun mas interesante y motiva hende pa bin Corsou. Aruba no tin un instrumento asina ainda.