ATA ta reparti 125 mil florin entre SMAC y MUSICA pa Carnaval 65

ORANJESTAD – Aruba Tourism Authority (ATA) ta reparti e suma di 125 mil florin entre e fundacion official di carnaval SMAC y fundacion di musico esta MUSICA como contribucion pa Carnaval 65 otro aña. E sumanan reparti ta 100 mil florin pa SMAC y 25 mil florin pa MUSICA. Durante e firmamento di acuerdo pa e fondonan aki dialuna mainta, ATA a mustra nan satisfaccion cu e trabou cu ambos fundacion a haci ultimo tempo segun e CEO Ronella TjinAsjoe. Y como tal a compromete nan mes un biaha mas pa e siguiente temporada di carnaval. E ta un contribucion cu ATA ta hacienda ya for di 2016. 

CONTRIBUCION

E diferencia di suma ta debi na e embergadura cu cada fundacion ta duna na carnaval y cu ne, cada uno tin diferente responsabilidad pa cu e periodo carnavalesco segun e CEO a sigura NoticiaCla dialuna mainta. E rekisito ta varia pa e dos fundacionan dependiendo e suma, pero nan ta e.o. cu mester por presenta cifranan annual aproba pa un instancia independiente reconoci. Ata su contribucion tur aña tambe ta pa cu e cobertura internacional pa medio di periodistanan internacional cu ta bin Aruba durante e periodo aki.