Polis ocupa cu varios pelea den weekend

ORANJESTAD - Polis mester a atende varios pelea den fin di siman. E prome tabata diasabra unda cu unidadnan policial a keda dirigi diasabra pa un pelea formal riba caya na Scobiyostraat na Pos Chikito. Prome patruya cu a presenta a topa cu un homber na sanger y a solicita pa ambulans presenta pa atende cu e victima. Polis a tuma dato di e victima y a papia cu un otro persona cu a mira kico a pasa. Otro pelea registra tabata diadomingo marduga ora polisnan a keda manda pa Watergate cu ta situa na La Sallestraat pa un pelea formal na e dicho bar. Aki patruya a yega topa cu un homber benta abou na sanger. Tabata un pelea cu varios persona envolvi pero dos a keda atras herida. Unidad di ambulans a presenta pa atende cu nan y polis a tuma dato.