Doñonan di auto cu numbernan ‘nobo’ a cambia esaki pa uno blauw

ORANJESTAD – Un fayo den comunicacion, a pone cu dos auto tabata coriendo rond na Aruba cu dos number di auto nobo, den e caso aki cu color y signatura di 2019. Algo cu no ta posibel legalmente. Mientrastanto e agencia di auto cu a haci e ekibocacion, a cambia e numbernan di auto pa uno blauw, vigente pa e aña aki ainda. Director di impuesto Luenne Gomez a confirma pa NoticiaCla loke a sosode y kico e agencia a haci. E berdad ta cu e agencia a haya ok di DIMP pa traha un “zelfgemaakte plaat” pa e aña aki pero no pa otro aña. Ey e confusion a bin. Mientrastanto e cliente a tuma contacto cu DIMP, cu a splik'e e situacion. E hecho cu ta core cu un number y/of color di number cu no ta vigente no ta aceptabel segun ley y como tal a informa e agencia di auto y e doñonan di auto tambe.

E SITUACION

E situacion anterior tabata cu departamento di impuesto a haci denuncia na polis diabierna pa auto cu ta coriendo cu number nobo (2019) falso. Faltando algo mas cu 3 siman pa aña bolter, a nota cu tabatin auto(nan) cu number di auto falso pa 2019 riba caminda. Departamento di impuesto (DIMP) a notifica diabierna cu a yega na nan conocemento cu tin auto riba caminda cu plach’i di number orañe cu blanco. “E acto aki ta completamente ilegal” e informacion ta bisa. “ Nos no a otorga ningun plachi di number 2019 ainda!” e departamento ta sigura. Ta conoci cu e plachinan ta yegando Aruba e luna aki y cu comienso di otro luna (januari 2019) lo cuminsa otorga e plachinan oficialmente. NOTA: E number usa aworaki pa e noticia, ta uno generico.