Denuncia haci pa auto cu ta core cu number nobo (2019) falso

ORANJESTAD – Departamento di impuesto a haci denuncia na polis diabierna pa auto cu ta coriendo cu number nobo (2019) falso. Faltando algo mas cu 3 siman pa aña bolter, ya tin e prome auto cu number di auto falso pa 2019 riba caminda. Departamento di impuesto (DIMP) a notifica diabierna cu a yega na nan conocemento cu tin auto riba caminda cu plach’i di number orañe cu blanco. “E acto aki ta completamente ilegal” e informacion ta bisa. “ Nos no a otorga ningun plachi di number 2019 ainda!” e departamento ta sigura. Ta conoci cu e plachinan ta yegando Aruba e luna aki y cu comienso di otro luna (januari 2019) lo cuminsa otorga e plachinan oficialmente. 

ALERTA

NoticiaCla a compronde cu ora cu a bin e notificacion cu lo tin auto(nan) ta coriendo rond caba cu un plachi ‘nobo’, esta di 2019, kico esaki ta. A bin saca afor cu 100% e number specifico cu tabata coriendo rond diabierna, tabata falso. Mes momento a informa cu nan a tuma e pasonan necesario, cu ta haci denuncia na polis. “Y nos ta pidi Aruba henter pa coopera pa informa Cuerpo di Polis asina cu mira auto riba caminda cu plachi falso. Esnan cu ta haci e actonan aki ta falta respet pa nos leynan y na esnan cu si ta cumpli” e mensahe ta finalisa bisando.