Corte: Homber a haya 8 aña castigo di prison pa a abusa su dos yiunan

ORANJESTAD – E homber R. a haya un castigo di 8 aña di prison diabierna mainta, pa a abusa su dos yiunan menor di edad y saca uno na estado. E castigo ta conforme peticion di fiscal. E acusacion tabata cu entre 2013 y 2018 e homber a tene relacion sexual cu su dos yiu muher di bou di 12 y 16 aña di edad. Den corte luna pasa ora cu e caso a sosode, e homber a admiti e cargonan aki. Rapport di psychiater ta mustra cu e homber su inteligencia ta abou y segun e expert, R no ta ‘completamente responsabel pa su actonan’. Interesante ta cu durante e caso, hopi cos a bin dilanti cu no tabata conoci ni pa polis durante investigacion. E homber tabata un tipo machista, cu tabata prohibi su yiunan di sali. Huez durante tratamento di e caso a mustra cu e homber a abusa di e confiansa cu su yiunan tabatin den dje y a laga nan marca pa resto di nan bida. Ambos mucha muher ta bou di tratamento di un specialista.