Ministerio Publico a tuma curpa di victima di candela den beslag

ORANJESTAD – Ministerio Publico a tuma e curpa di e victima di e candela di diaranson marduga, den beslag diaranson mainta. Esaki a keda confirma pa vocero di ministerio publico, Ann Angela na NoticiaCla.com. E la confirma tambe cu pa diaranson merdia mes lo haci autopsia riba e curpa. Di otro banda, a compronde tambe cu e investigacion riba origen di e candela den e compleho di apartamento, no por a tuma lugar ainda. ‘Ta wardando pa e huma trek op pa cuminsa (cu e investigacion)”, e vocero a sigura NoticiaCla.com.

Manera cu NoticiaCla.com a raporta anteriormente, tabata diaranson marduga pa mas o menos 2'or y 15 cu a drenta un informacion di un candela na un cas na Palm Beach. Mesora polis y brandweer a bay na e sitio. A compronde cu e candela a cuminsa parti abou di e edificio, y e victima tabata drumi riba e di dos piso. Tin indicacion inicial cu aparentemente e victima lo a stik door di e huma, pero e investigacion lo tin cu confirma esaki. Ora cu brandweer a sak’e for di e camber, mesora a pidi presencia di ambulance. Na yegada nan a cuminsa reanima e persona, pero despues di basta rato intentando pa re anima e persona, a bin ripara cu e no ta duna señal di bida mas. Mesora a pidi pa autoridadnan concerni y pa 3'or y 33, dokter ta constata morto di Marvin M Franca(26) naci Aruba y tabata biba na Palm Beach 504. A pidi slachtofferhulp pa trata cu e famia y Elmar pa desconecta e coriente. Pa 4 or y 25 Aurora Funeral home a bin busca e curpa. NoticiaCla.com ta manda palabra di condolencia na famianan di e fayecido.