ORANJESTAD – “Bo ta mira cu Hulanda ta midi cu dos midi, y especialmente cu ta un otro gobierno”. Esaki ta un reaccion di Prome Minister Evelyn Wever Croes diahuebs mainta pa NoticiaCla riba e asunto di nombracion di Henk Kamp como miembro di e colegio di supervision financiero CAFT pa Hulanda. Wever a confirma tambe cu Gobierno di Aruba a opone. E pregunta ta surgi despues cu recientemente un parlamentario di e partido di Wever (MEP) esta Endy Croes a lansa e critica den direccion di e miembro di CAFT aki, Henk Kamp, cu e tin cu retira pasobra e ta nombra contra ley. E ley ta stipula cu un miembro di CAFT no por tabata riba lista di un partido de pasado of presente. Y Kamp tabata miembro di VVD di Hulanda y minister.
OPONE
“Nos a opone. Nos a duna e comentario cu e ta contra di ley” Wever a bisa e portal aki. De hecho, gobierno a bisa cu e ley full e tempo ey den oposicion, Wever tabata contra. “Dia cu e ley a bin Parlamento, ora cu gobierno di AVP a bin cune, nan no tabatin e excepcion pa politiconan of ex politiconan den e ley” Wever a sigui bisa. Segun e prome mandatario, ta durante tratamento di presupuesto, parlamentarionan di AVP a lanta bisa cu nan kier evita cu hendenan manera Nilo Swaen, Nel Oduber, ex politiconan drenta den CAFT.
AMIENDA
“Anto nan a haci e cambio ey cu tabata dun amienda di parlamento durante reunion, sin consulta cu Hulanda. Pasobra e momento ey Sybilla Dekker (predecessor di Kamp) tabata miembro di Caft y sra Dekker tabata un minister den pasado” Wever a continua. Pues e tempo ey Wever cu tabata den oposicion (hunto cu varios e tempo ey awe ta den gobierno) a bisa cu e ta un cambio nobo y cu ‘zoiezo’ no ta comparti full e ley. Wever ta haya tur esaki weganan politico di e tempo ey di AVP. Hulanda sinembargo, segun Wever, a acepte, pero esey tabata nan responsabilidad. “Pero ora cu na mei Henk Kamp a wordo proponi door di Hulanda, mi a bisa Hulanda, bo ta violando ley. Cu esaki bo ta violando ley flagrantemente” Wever a sigui bisa. Acerca, Wever a bisa e portal aki cu e ley ta inconstitucional y e ley no ta corecto y tin pensa di cambia esaki. “Pero ey bo ta mira cu Hulanda ta midi cu dos midi, y especialmente cu ta un otro gobierno. Cu e gobierno aki, e midinan ta hopi mas skerpi. Bo ta sinti’e hopi mas skerpi riba e liniaal” Wever a finalisa bisando.
DEN HAAG - E siman aki cu Minister Maduro di Finansa ta na Hulanda, e mandatario a reuni cu Presidente di CAFT, sra. Lidewijde van Olerongen. Minister Maduro a duna un update riba e trabounan pa mehora maneho financiero di Aruba y a repasa e proceso pa yega na un miembro nobo pa Aruba den CAFT ya cu e termino di sra. Helen van der Wal ta bay yega su fin na augustus e aña aki. E mandatario a combersa tambe riba e reglanan presupuestario y e maneho cu ta wordo traha pa trata cu surplus, ya cu pa basta aña Aruba a conoce solamente presupuesto cu deficit y awo Aruba ta trahando cu presupuesto cu surplus.
ORANJESTAD – Desde awor en adelante, gobiero ta duna permiso solamente pa traha boutique hotel, vs cualkier otro tipo di hotel. Minister Dangui Oduber diamars a anuncia cu a introduci e maneho nobo di otorgamento pa permiso di hotel den cuadro di turismo sostenibel. “E maneho aki ta tene na cuenta cu Aruba no por sigui crece na e velocidad cu e ta bayendo y mester tuma accionan concreto pa frena e cantidad di cambernan cu ainda lo mester construe”.
ORANJESTAD – Ora cu a kere cu awor si ta bay habri frontera cu Venezuela pa e parti maritime, manera tabata indica, dialuna anochi gobierno di Aruba a informa cu un biaha mas ta prolonga e ciere di frontera cu Venezuela, te por lo menos augustus di e aña aki. Frontera cu Venezuela ta cera desde aña 2019, na momento cu Gobierno di Venezuela a cera e frontera unilateralmente. Na mei di 2023 a habri e frontera maritimo basa riba palabracionnan haci entre autoridadnan di Aruba y autoridadnan di Venezuela.
ORANJESTAD - Minister Glenbert Croes a anuncia cu pronto lo bay organisa un Jobfair specialmente pa pensionado y esnan di 45+. E categoria di edad aki unda tur comerciante y gremionan, hunto cu departamentonan di Labor esta DAO y DPL lo ta presente pa asisti y intermedia unda ta necesario.
ORANJESTAD – Un declaracion cu minister di Labor Glenbert Croes a haci dialuna atardi via un comunicado di dje, a hala atencion den dialuna atardi relaciona cu e tema di labor den sector hotelero. Esaki pasobra e la declara den e comunicado textualmente cu ‘manera ya ta conoci, e aña aki lo tin 3000 camber di hotel adicional ta habri’. Pero e declaracion cu mas a hala atencion ta e hecho cu segun e mandatario “ Ta bay tin mester di por lo menos 9000 trahado pa e hotelnan aki por opera y duna e servicio optimal cu nan ta desea”. Esey tambe ta un citado directo di e comunicado. Y e mandatario ta cita ‘ segun indicacion inicial’. Mester bisa si mesora cu e base di e comunicado tabata pa anuncia cu ta bay tin un job fair pa pensionado y persona di 45+. Y ta den e comunicado, e informacion ariba menciona ta aparece tambe.
ORANJESTAD – E lider politico hoben di e partido politico Direccion Politiea Leonardo Figaroa , ta pensa cu den e proximo gobierno, e lidernan politico di e partidonan den coalicion no mester bira minister sino bay den Parlamento. Y mester forma e gobierno cu solamente 7 minister y tur mester ta vakminister, esta no politico. Cu esaki, Leonardo ta pensa cu mester ‘kibra tradicion’.