Ruiz: CAFT ta usa tono abusivo y ta parse di no ta independiente

ORANJESTAD – “Gobierno di Aruba ta sorprendi di e conseho   recientemente di e colegio di supervision financiero CAFT na gobierno, unda cu CAFT aparentemente ta atende gobierno riba palabracionan cu no a keda formalisa ainda cu Hulanda”. Asina e carta di gobierno di 5 pagina dirigi na e colegio, - cual carta NoticiaCla tin den su poder-, ta cuminsa. Den e carta cu un tono basta fuerte den direccion di CAFT, gobierno di Aruba (lesa: Minister di Finanza Xiomara Ruiz Maduro) a hala  atencion asina di e colegio. Ruiz ta culpa CAFT di ta e.o. ‘presenta un bista irealistico di e situacion real y e relacion entre e colegio, Aruba y Hulanda’. NoticiaCla diaranson caba a referi brevemente na carta aki basa riba un reaccion di e mandatario na e portal aki, unda cu gobierno ta mustra CAFT cu gobierno no ta bay cumpli cu e peticion pa reduci e suma di 14.2 miyon florin prome cu fin di 2018, simplemente pasobra gobierno no por. Pero awor, cu e carta den poder di e portal aki, ta nota cu e tono ta mucho mas fuerte.

NO NEUTRAL

Ruiz ta mustra cu den e conseho di CAFT, tin contradiccionan, pa cual ta crea e impresion cerca Gobierno cu no por papia di un organo consultativo independiente cu ta supervisa e cumplimento di Aruba pa cu normanan acorda. Ruiz ta sigui na aclaria un 6 punto na CAFT kico e situacion ta entre CAFT, Hulanda y Aruba. Entre nan, cu gobierno ta mustra e colegio cu ainda CAFT no a duna Aruba un conseho riba e FEM (Memorando Economico Financiero), siendo cu esey tabata tarea di e colegio. 

PALABRACIONAN NO HACI

E mandatario ta sigui mustra CAFT cu nan, esta CAFT, a opta pa den su comunicacion pa cu gobierno, referi cada bez na ‘palabracionan cu nunca no a ser haci cu e colegio’. “E palabracionan na cual bo colegio ta referi na dje, ta basa riba palabracionan no haci ainda y entre Hulanda y Aruba. Bo colegio no ta un partner di negosacion, sino un tercer partido”, Ruiz ta sigui bisa. Loke ta hala atencion ta segun Ruiz, cu mientras cu CAFT no a duna conseho riba e FEM, e ta referi na dje como palabracionan haci entre gobierno y CAFT. Segun Ruiz, CAFT a laga sa cu no por duna conseho riba e documento e, pasobra e no a haya e mandato pa haci tal. “Ta sorprende nos cu un documento cu bo no kier a duna conseho ariba, y cu gobierno a traha riba propio iniciativa, awor a para bira un ‘palabracion entre gobierno y CAFT’, riba cual gobierno mester responsabilisa su mes na dje na CAFT”. 

SINTA RIBA STUL DI GOBIERNO

Manera cu Ruiz a bisa den un conferencia di prensa recientemente, cu ta parse cu CAFT kier sinta riba stoel di gobierno, asina mes Ruiz a culpa CAFT di dje. “Como organo consultativo di gobierno, CAFT no por sinta riba stoel di gobierno” Ruiz ta sigui bisa den e carta. Esaki pasobra segun Ruiz, CAFT enbez di vigila gobierno riba e normanan acorda segun ley di LAFT, ta controla gobierno riba normanan no formalisa ainda. Y loke cu Ruiz ta condena mas ainda, ta e hecho cu no obstante e hecho cu gobierno di Aruba tabata transparente durante un temporada dificil y a tuma medida necesario, CAFT ta mata gobierno ya na comienso di e proceso. “Ta parse cu CAFT no kier duna gobierno espacio pa por maneha, y constantemente ta opta pa eherce presion innecesario”. 

CONTRADICCIONNAN 

Ruiz no ta caba eynan. E ta sigui culpa CAFT cu nan ta informa den forma ‘abusivo’, cu presupuesto 2018 no a cumpli cu recomendacionan haci pa CAFT. “No tin palabracionan haci cu CAFT riba gastonan di personal y e aplicacion di entradanan sorpresivo” Ruiz ta mustra CAFT. “E asuntonan aki ta hinca den e FEM, y awor (desde 22 di november 2018) den e protocol recien cera cu Hulanda. E protocol ta valido pa 2019 y pues pa loke ta trata e presupuesto 2018, esaki no ta relevante”. Y asina Ruiz ta sigui atende CAFT riba un sin fin di problema cu e tin cu gobierno. 

EFECTIVO?

Na final Ruiz ta mustra CAFT cu, basa riba e contradiccionan, ‘cu e colegio su supervision no ta efectivo’.  Como tal conforme e protocol recien, lo  evalua e efectividad di CAFT y e evaluacion haci pa e colegio. Basa riba esaki ta mustra cu e puntonan di recomendacion na cual CAFT ta referi, ta un refleho unilateral di combersacion di e colegio. “Gobierno no ta permiti pa añadi nada, coregi nada of duna comentario, a lo menos cu esaki sosode via un reaccion formal den direccion di e colegio”, e mandatario ta sigui bisa. “Di un compromiso yega entre dos partido riba puntonan acorda como consecuencia, no ta e caso”. Ta notable cu gobierno no a gusta e hecho cu CAFT ta haci e comentarionan aki publico. “Ademas, no a palabra cu gobierno pa haci esaki ‘publico’ manera cu bo colegio ta hacie awor segun e conseho riba presupeusto 2018”, Ruiz ta bisa finalmente. Pa cualkier aclariacion, Ruiz ta bisa e colegio, pa tuma contacto cu directie financien.