ORANJESTAD – Diabierna 30 di november ultimo a tene luga den Renaissance Convention Center e Aruba Chamber Business Event 2018. Esaki ta e evento anual di Camara di Comercio y Industria Aruba (KvK) enfocando riba e empresario local y poniendo enfasis riba un topico actual. Pa e ocasion aki e topico di e anochi tabata dirigi riba ‘sustainable entrepreneurship’ caminda e importancia di sobrevivencia di e empresa a wordo discuti. E topico aki ta hopi discuti tanto den sector priva como sector publico y KvK a logra conecta e comerciante y trece mas conscientisacion durante e evento aki. Un danki ta bay na e patrocinado principal pa e evento cu ta Caribbean Mercantile Bank N.V.
E evento a cuminsa cu un palabra di bonbini door di e moderador, Sra. Michele Brooks y despues e discurso di Presidente Suplente di Directiva di KvK, Sr. Omar Tromp. Durante su discurso Sr. Tromp a elabora riba inovacion den sector priva, e importancia di comparti informacion y tambe mehoracion di leynan laboral pa por yega na un empresa sostenibel.
E prome presentacion di e anochi a wordo duna door di Sra. Lisette Malmberg, kende a conta di su experiencia di forma parti di un negoshi di famia y con esaki a crece bira un negoshi sostenibel. Tambe el a splica riba e iniciativa pa yuda e bienestar general via Hope Foundation.
E segundo presentacion tabata di e invitado internacional, Sra. Angel Rich. Sra. Rich a comparti su experiencia riba con pa haya stabilidad emocional como un empresario. El a papia di su experiencia personal y con el a crece como persona y logra yega na su propio negoshi. Ademas el a duna e publico presente algun conseho con nan tambe por crece y midi nan exitonan. Siguientemente a sigui un sesion caminda publico presente por a haci pregunta na e oradornan. Directiva di KvK a clausura e parti oficial cu algun palabra y a gradici e oradornan y tur esnan presente pa haci e anochi uno exitoso y sperando cu a motiva nos comerciantenan na crea negoshinan mas sostenibel pa bienestar di Aruba.
Despues di e presentacionnan a sigui cu e parti social caminda por a discuti riba e topico di e anochi y crea of reforsa e lasonan comercial den un ambiente ameno. Esnan presente por a comparti nan experiencia acompaña di un aperitivo y bebida. Esaki hunto cu e bon entretenimento musical di Tsunami.
En conexion cu e evento KvK a produci un encuesta pa asina colecta informacion riba e evento anual. Si bo persona tin algun comentario of sugerencia pa engrandece e evento anual di KvK y ta interesa den e encuesta, fabor di manda un e-mail na [email protected] of tuma contacto cu e departamento di BIS na telefon 582-1566 ext. 27/30. Intencion di KvK ta semper pa brinda informacion y contribui na un miho comercio cu mas oportunidad y exito pa Aruba.
ORANJESTAD – E banda popular di Trinidad Kes the Band ta confirma pa presenta durante e proximo edicion di Flip Flop Festival dia 1 di juni proximo. Durante un conferencia di prensa diahuebs atardi, organisadornan a anuncia esaki, como un di e varios bandanan internacional cu lo ta presente durante e anochi aki. E intencion ta pa dentro di 2 siman presenta demas artistanan internacional tambe. E evento lo tuma lugar riba Bushiri Beach, y lo ta parti den varios seccion. A cuminsa bende carchi caba awe unda cu e prome cantidad di carchi ta bay na 45 florin estilo ‘early bird’ pa tempo limita. Flip Flop Festival ta un producto di cerbez Chill, y Brouwerij Balashi hunto cu Tropical Bottling Company su productonan Coca Cola y Bacardi. Fuera di e artistanan internacional, lo tin artistanan local manera e.o. Tsunami.
ORANJESTAD – Diabierna awor tin estreno di e documentario localmente produci titula ‘I can’t be moe’. Un documentario unda cu e productor ta sigui e bida di e conocido personahe local Alice van Romondt durante 2 aña. Pregunta ta, con a yega na e titulo asina ‘captivo’, un combinacion di Ingles y Hulandes y con esaki a yega pa bira e titulo di e documentario. Tanto e productor Rebecca Roos, como e suheto di e documentario, Alice van Romondt a splica esaki den e programa Noticiacla LIVE diamars anochi. E documentario ta pasa diabierna anochi 19 di april pa 8'or di anochi den Cas di Cultura y ta costa 25 florin pa entrada.
ORANJESTAD – Manera a bira conoci caba, sigur anto pa tur amante di e genero musical aki, luna di april ta celebra mundialmente e aprecio pa jazz. Un di su promotor y exponentenan di mas grandi riba nos isla, esta e maestro di percusion Carlos Bislip a sa di prepara, un biaha mas, un merecido celebracion.
ORANJESTAD - Recientemente Fundacion Aruba One Happy Island Lions Club hunto cu Friends of Lions a organisa e prome “Tayo riba Mesa”, pa aña 2024. Esaki ta un proyecto den cuadro di e programa di Lions International “Hunger Relief”, caminda danki na e sosten di comunidad y Friends of Lions ta yuda famianan den necesidad.
ORANJESTAD - Diaranson anochi na Cas di Cultura, Minister Maduro di den nomber di Gobierno di Aruba, presenta un reconocemento na sr. Ivan Jansen pa su contribucion significante na e herencia cultural musical di Aruba. Segun e mandatario, den e documental presenta riba Jansen, nos ta cera conoci cu e musico Ivan hopi mas di acerca, ya e ta bay comparti su historia di su carera musical, su conocemento, produccionnan, su contribucionnan na diferente musiconan/artistanan local, alabes su logronan local y internacional y e retonan cu ela encontra durante su carera musical E mandatario a repasa e CV impresionante di e musico tambe, indicando cu Ivan no ta solamente un musico, un guitarista clasico y di jazz, sino tambe e ta productor, compositor, areglista, educador, lider di banda y empresario. “Nos ta sinti nos orguyoso di un video documental contando historia di un Arubiano y produci door di nos mes yiunan di tera. Cu e iniciativa di Ivan aki por inspira mas persona cu tin un historia pa conta, pa traha un documental. Asina nos por laga e historia atras pa generacionnan cu ta bini despues di nos” e mandatario a bisa entre otro.
ORANJESTAD – Conocido ciudadano di Aruba Alice van Romondt, ta bira e centro di atencion durante un documentario largo metrahe di e productor di cine Rebecca Roos cu lo ta visible durante e di 10 edicion di Curaçao Internacional Film Festival e siman aki. E documentario, titula “ I can’t be moe; Alice van Romondt (I can’t be tired)” ta keda present ana Corsou entre dianan. 12 y 14 di April. Un siman despues, lo estrena e pelicula akin a Cas di Cultura. Prome cu e estreno na Aruba tin oportunidad unico di wak un exposicion di un seleccion di Alice su collecion priva di arte den e sala di expo di Cas di Cultura for di 6:30 PM.