Ruiz na CAFT: Baha 14 miyon mas pa fin di aña no ta posibel

ORANJESTAD – Gobierno a contesta e colegio di supervision financiero CAFT, cu e no por baha presupuesto cu 14 miyon florin prome cu e aña aki ainda. Asina minister di finanza Xiomara Ruiz Maduro a confirma pa NoticiaCla. E contesta ta conforme cu e declaracion di minister presidente Wever Croes algun siman pasa cu tambe a bisa cu simplemente ‘no por’. “No ta cu nos no kier, sino simplemente nos no por” Wever a bisa na e occasion ey. No ta conoci pa e portal aki, ki resultado e contesta aki por tin pa gobierno di Aruba. 

Tabata siman pasa cu CAFT a manda un carta pa gobierno di Aruba cu e recomendacion pa entre otro reduce presupuesto mas ainda cu 14.2 miyon florin y no gasta e placa reserva pa e.o. fondo di crisis. Esaki tabata e ultimo carta como reaccion riba e ‘raportahe di ehecucion’ esta e uitvoerings reportage di e di tres cuartal. Gobierno a reacciona bisando cu no por, pasobra esey lo nifica entre otro cu gobierno mester manda e ambtenaarnan cas y of mester paga nan mitar salario. Algo cu no solamente gobierno no por haci, pero cu ta ilegal tambe. Y Ruiz a contesta cu esaki pues cu gobierno no por.