Ex prome minister Gerrit Schotte a entrega su mes na prison

WILLEMSTAD – No obstante e awacero fuerte na Corsou diaranson mainta, un grupo di simpatisante y famia a compaña ex prome minister y lider di partido Movimento Futuro Korsou Gerrit Schotte pa porta di prison Bon Futuro. Manera palabra, a topa na plenchi na misa di KoraalSpecht y a cana bay porta di prison. Schotte, acompaña pa su pareha Cicely vd Dijs, a lidera e grupo pero a opta pa no haci ningun declaracion, pasobra ‘esaki no ta bay ta e ultimo palabra’, segun Schotte mes a declara. Varios persona rond di dje tabata emocional, pero Schotte y pareha aunke cu tristesa riba nan cara, tabata mustra duro. Pero net prome cu habri e heki pa drenta e tereno di Bon Futuro, Schotte no a contene su lagrima mas den brasa di su pareha. Despues a haci e ultimo cana pa e edificio mes pa despues, acompaña pa su abogado Marije Vaders, e drenta prison mes. E tin cu sinta un castigo di 3 aña pa corupcion y labamento di placa, pero ta premira cu e por sali afo dentro di un aña y mei. Su pareha Cicely vd Dijs tambe ta warda un castigo di prison, pero su caso ta diferente den sentido cu conforme cu e largura di su sentencia, esaki no ta considera ‘urgente’, pues por warda un rato mas cu ne. E tin cu sinta un castigo di 9 luna di prison, pero aki tambe ta premira cu e por sinta apenas 5 a 6 luna tambe, cu reduccion di e VI (1/3 parti di e castigo y cu Buena conducta). Potretnan ta screenshot di TV Direct di Corsou.