Fiscal Mayo a manda Schotte carta awe cu instruccion pa meld na prison  

WILLEMSTAD – Fiscal Mayo di Ministerio Publico diamars a manda un carta pa ex prome minister Gerrit Schotte cu instruccion pa meld su mes na prison Bon Futuro diaranson mainta. Asina vocero di Ministerio Publico Norman Serphos a confirma pa NoticiaCla diamars. “OM a regla tur documento y papeleo y prison a haya tur papel” Serphos a añadi.   

CARAVANA

Mientrastanto partido MFK a pidi su siguidornan pa compaña Schotte pa prison. E intencion ta pa tur hende topa pa 8:30 am riba plenchi di misa di Koraal Specht y di eynan ta sali cana hunto pa bay cu Schotte na porta di prison. “Nos kier suplica tur hende cu kier bini pa compañá Gerrit pa nan comportá nan mes di forma civico. No ta tolera nada for di sla” e mensahe ta bisa riba portal di miembro di partido Charles Cooper.  

CONFERENCIA

Tabata durante e ultimo conferencia di prensa di Schotte dialuna atardi, cu el a informa prensa di su intencion di entrega su mes diaranson mainta. Esaki despues cu intent di su abogadonan pa e por entrega su mes na fin di maart di otro aña, no a materialisa. Segun ministerio publico, e tempo tabata mucho corto pa trata e peticion di Schotte. Como tal el a informa e ora na final di su conferencia, cu e ta meld diaranso mainta na prison Bon Futuro pa cuminsa sinta su castigo di 3 aña di prison. “Mi ta prepara pa bay sosega mi mente, mi alma leu for di famiar den locual awe nos ta yama ‘Bon Futuro’ (prizon:red)” Schotte a bisa. El a comparti su examen medico recien, cu ta bisa cu fuera di un poco cholesterol halto, su salud ta bon.  “Mi ta laga atras un famia bunita” Schotte a bisa dialuna, refiriendo na su dos yiunan muher chikito, y nan mama y e dos yiunan grandi cu e tin. El a haci un peticion na pueblo, pa no keda keto y sigui busca e berdad. E ta considera su mes un preso politico awor. “Diaranson awor 9’or di mainta mi ta entrega mi mes” Schotte a finalisando. Prome cu esey, el a repasa cierto partinan di e caso te cu awor. Potret ta screenshot di transmision di conferencia di prensa, cortesia di Yves Cooper.