ABV: Raad van Toezicht di hospital mester retira y trece Theo de Kool bek

ORANJESTAD – Sindicato di trahadonan di Hospital  esta Arubaanse Bond van Werknemers in de Verplegende instellingen (ABV) a duna gerencia di hospital te diabierna (7 di December 2018) pa tuma nan retiro, sino nan ta wordo baha. Asina presidente di e sindicato Gina Maduro a bisa entre otro riba su pagina di Facebook y den entrevista na otro medionan diamars atardi. Tambe un di e exigencianan ta pa gerencia pone e director financiero Theo de Kool bek na trabou tambe (el a keda suspendi recientemente). Maduro ta haci mencion di intimidacion di parti di e gerencia (hunta di supervision, hunta di comisario y directive) na trahadonan y recientemente na e presidente di e sindicato mes.

ULTIMATUMDen un ultimatum poni riba e pagina, Maduro a bisa pa e esnan envolvi “ Duna honor na bo mes i bandona e puesto voluntario. Boso tin te dia 7 december 2018 pa baha. I si no ta asina nos lo cuminsa cu plan B.  ABV tin e mandato absoluto di su miembronan cu nos no ta acepta e mal maneho aki” e mensahe ta bisa. No ta conoci pa e portal aki kico plan B ta. A haci mencion di algun persona den raad van toezicht cu lo no ta funcionando bon, manera e presidente Gino Goeloe, y Edwin Tromp particularmente. Fuera di esey, a haci mencion di e otro miembronan, dr Emil Westrate, Luenne Gomez Pieters, y e director mes Ezzard Cilie, cu nan ta considera un persona hopi arogante y dictatorial. Maduro a recorda Cillie cu ta nan a yuda pon’e eynan y nan lo por bah’e tambe. 

MENASA

Segun Maduro, lo a menasa su persona y e vice presidente di e sindicato cu nan lo keda retira di trabou. “ Esey tabata e druppel di intimidashon. Esaki ta conta pa tur e otro empresanan y nos colega sindical den lucha cu sindicato no lo permiti ningun menasa di ningun hende den bo funshon como sindicato” e mensahe a finalisa.

REACCION HOSPITAL

E portal aki purba di tuma contacto cu gerencia di hospital, pero no tabata exitoso. Segun vocero di e hospital, no a ricibi reaccion di e director ainda.