CAFT: Ta Gobierno di Reino ta aproba candidatonan pa CAFT

ORANJESTAD – “Gobierno di cada pais respectivo, ta dicidi ken nan ta propone como nan propio candidato pa miembrecia di e colegio di supervision financiero pa Aruba, esta CAFT”. Asina CAFT a bisa como contesta riba pregunta di ken ta esun cu ta postula e candidatonan, y e contesta ta conforme e ley di LAFT, cu ta e ley cu ta formula e existencia di CAFT. Pero tambe mas interesante, ta segun CAFT, ken ta esun cu ta finalmente aproba esaki. “Gobierno di Reino ta esun cu ta tuma e decision” CAFT a sigui contesta. Esey ta nifica cu si tin fayo haci den e caso aki, e responsabilidad ta pa gobierno di Reino. Den e caso aki pues basa riba e ley di LAFT, por saca afor cu e representante di Hulanda, Henk Kamp ta esun cu no por ta miembro di e colegio, y gobierno di Reino a faya (atrobe) cu e nombracion aki. Atrobe, pasobra den pasado caba, tabatin u

RECLAMO DI PARLAMENTARIO DI MEP

Tabata recientemente cu parlamentario pa partido MEP Endy Croes a hala atencion publico di e hecho aki, indicando cu e miembro pa Hulanda, esta Henk Kamp su nombracion ta incorecto. Croes a basa su mes riba e articulo 4 di e ley di LAFT cu ta stipula esey.Den e articulo ey, esta Articulo 4.1 inciso d, ta bisa cu ‘un miembro di e colegio no por ta miembro di Parlamento of un organo similar di Hulanda, of ta riba un lista politico of a para riba un lista politico den Reino Hulandes. Kamp tabata riba lista di partido VVD den pasado y tabatin e funcion dos biaha como minister. Croes a mustra cu esaki no ta corecto y cu como tal Kamp mester entrega su retiro.  E predecessor di Kamp tambe tabata minister, pero den e caso aki no tabata riba un lista politico, esta Sybilla Dekker. 

MIEMBRO DI ARUBA

Investigacion di NoticiaCla ta mustra cu den caso di Aruba, gabinete Wever Croes a apunta su candidato e aña aki como su representante, esta Hellen van der Wal. Y conforme e ley, van der Wal mester a retira di su funcion na Raad van Advies unda e tabata ambtenaar, pa e por a eherce su funcion nobo. Cu esaki ta cumpli cu e mesun articulo 4.1 inciso k, cu ta bisa cu un miembro di e colegio no por ta ambtenaar den gobierno di Aruba, of inciso h, ta miembro di Algemene Rekenmamer di Aruba of un colegio comparable, cu ta Raad van Advies, esta un organo consultativo di gobierno. 

DIFERENTE MIDI

Pues ta parse cu den e caso aki, ta parse cu gobierno di Reino a midi cu dos midi, esta di un banda a exigi di Aruba si pa su representante retira di su funcion anterior, pero di Hulanda si ta permiti pa viola e ley. CAFT mes unabez cu nan ta nombra, no por disputa esaki y of dicidi si nan nombracion ta corecto of no. Como contesta riba e parti aki, CAFT a bisa textualmente cu “e nombramentonan en berdad ta pa CAft, pero CAft no ta forma parti di e proceso di nombramento, ni ta tuma decision tokante di e nombramentonan.  Esnan ku ta tuma decision tocante di e nombramentonan ta e respectivo paisnan. Den e caso aki Hulanda y Aruba.” E colegio a finalisa bisando NoticiaCla. 

REACCION DI GOBIERNO

NoticiaCla a acerca prome minister Evelyn Wever riba e tema, pero e no tabata na altura di e articulo y e asunto y a keda di bin bek cu un reaccion. Te cu ayera nochi ainda e no tabata cla pa duna un reaccion, indicando cu e tabata ocupa cu e contestacion di preguntanan pa Parlamento pa loke ta e tratamento di presupuesto 2019, cu ta cuminsa dia 10 di December proximo.