‘Impasse’ pa cu deal di InselAir ta resolvi y reunion ta sigui awe

WILLEMSTAD – E reunion di creditornan di InselAir International por sigui diamars atardi manera planea. E caso sumario cu e administrador encarga kier a entama contra accionistanan y e consorcio di financiadornan no a sigui dialuna. “Nos a sali afo” Rogier van Den Heuvel a declara den e edicion di diamars di e matutino di Corsou Antiliaans Dagblad. E consortio a duna su aprobacion pa e deal y e accionistanan a mustra disponibilidad pa firma. Un dia prome, manera cu NoticiaCla a raporta anteriormente, cos tabata pega. 

DEAL

Segun abogado di e accionistanan, nunca tabata nan intencion pa strobe e deal cu e aeroliña interCaribbean. Den e asina yama Heads of Agreement cu e administrator a negosha, e accionistanan mester firma pa traspasa nan accionan pa 1 dollar pa interCaribbean. Pa esey sosode, nan tabatin mester di bendicion di e consorcio. Te cu diabierna esey no tabata e caso. Mientrastanto e bendicion ey a yega. Ningun di e dos partidonan tin beneficio pa bringa e deal nobo aki. Si e acuerdo no keda acepta, InselAir lo keda declara bancarota y ningun hende lo haya placa.  Huez mientrastanto lo tin cu evalua e deal y bay di acuerdo cu ne.