Edificio di DIMAS/DAO lo keda sera por lo pronto

ORANJESTAD – Enbes di habri bek pa servicio diaranson manera previamente anuncia, e edificio di DIMAS y DAO ta keda sera por lo pronto. Esaki a keda confirma diamars atardi laat pa directora di DIMAS, Kathy Ruiz Paskel na NoticiaCla.com. Segun Paskel, no a keda cla cu e trabounan y a haya mas asunto cu tin cu bay atende cune aworaki. Mas e no por a bisa. Loke esaki ta nifica segun Ruiz, ta cu por lo pronto e edificio lo keda sera, te ora cu keda cla cu e trabounan di investigacion. No ta descarta cu lo tin cu muda e personal di DIMAS tambe (manera cu a anuncia anteriormente pa e trahadonan di labor (DAO)). E periodo pa cual esaki lo tin cu sosode, no ta conoci pa Ruiz.

Tabata siman pasa ainda cu e directora di DIMAS a indica cu contrario na e trahadonan di DAO (dept di labor), esnan di DIMAS, lo no mester a muda of traha for di cas. Esaki segun directora di DIMAS, Kathy Paskel a sigura NoticiaCla.com. “Mi por informabo cu DIMAS lo no muda, considerando e resultadonan y conseho ricibi” Ruiz-Paskel a bisa NoticiaCla.com na e occasion ey. Minister di labor, Paul Croes a bisa NoticiaCla.com sinembargo cu e trahadonan di DAO, si lo muda pa otro lugarnan y algun lo traha te hasta for di nan cas.

DIMAS a avisa cu nan tin cambio atrobe pa cu e situacion di cita di permiso. Algo cu awor un biaha mas ta keda cambial.E oficina mes lo mester a habri bek diaranson mainta 8:30am.

Tabata diahuebs siman pasa ultimo cu despues di investigacion den edificio di DAO y DIMAS, NoticiaCla.com a haya confirmacion di minister Croes (labor) cu desision a cay cu e edificio completo no ta apto, y cu lo muda varios departamento for di e edificio actual. . Algun di e trahadonan di DAO (Labor) lo a wordo acomoda na edificio di mediador di gobierno, mientras cu algun lo bai na 5o piso unda cu si no tin problema segun Croes. Tambe algun trahado lo sigui traha for di cas, continuando cu nan investigacion.

Un dia prome, NoticiaCla.com a tende caba cu mientras cu ta soluciona e problema di holo malo y otro asuntonan higienico, trahadonan di departamento di Labor (DAO)  y di DIMAS lo keda cas. Esaki ta e decision cu minister di labor Paul Croes a sigura NoticiaCla.com diaranson mainta. No ta descarta cu ta buscando un edificio temporal pa ubica e trahadonan (57 total), pendiente e trabounan cu lo tin cu haci pa drecha e situacion structuralmente. Fuera di DAO, tin tambe e trahadonan di DIMAS, cu tambe a bay den accion siman pasa diaranson mainta. Hunto, ta papia di un total di 140 trahado entre DIMAS y DAO. No tabata conoci si pa e trahadonan aki tambe e regla ey lo conta, pero segun Croes, e la sigur cu su colega minister di DIMAS Benny Sevinger, lo por a haci mescos.

Mes momento e mandatario a mustra su disgusto pa e hecho cu e director di Labor no a sigui e orden di e mandatario. “Mi a bise e director cu mientras cu no tin claridad riba un solucion pa e holo desagradabel, no pone ningun hende na trabou” Croes a bisa. E director sinembargo, no a cumpli cu e orden aki. “Mi ta lamenta cu e trahadonan a wordo poni toch na trabou, siendo cu e instruccion tabata hopi duidelijk pa labor cu no por pone trahadonan den un ambiente cu no ta bon pa nan salud” e la sigui bisa. E no kier a bisa si cu e director a desobedece un orden, pero a bisa si cu e la mustra su descontento. Segun Croes, trahadonan por haci cierto trabounan for di nan cas, pa toch presta servicio, pero mientras cu e lugar no ta apto, nan lo keda cas. “Nos a duna e director orden awor atrobe pa mientras cu no tin solucion pa e problema, no ta laga ningun hende traha”.