Atrobe bida di InselAir ta colga na un hilo

WILLEMSTAD/ORANJESTAD – Un biaha mas e bida di e aeroliña InselAir international ta colgando na un hilo. Si algun siman firmamento di un MoU entre e compania y un otro aeroliña internacional interCaribbean mester a bira e salbacion, e acuerdo aki ainda no ta  consolida y confirma. Y diamars atardi 4 di December pa 3’or di atardi, huez mester haya confirmacion cu partidonan (accionistanan y e consortio) a haya otro sino e por dicidi pa declara e compania local ainda bancarota. Algo cu no a pasa ainda, esta e acuerdo menciona, segun e matutino di Corsou Antiliaans Dagblad. Den cuadro di esaki, e curato a entama un caso sumario dialuna mainta pa forza partidonan yega na un acuerdo prome cu diamars atardi pa evita lo ‘peor’. 

CASO SUMARIO

Segun e matutino, e curator Rogier van den Heuvel a laga partidonan sa cu e lo por entama un caso sumario awe mainta ainda. Den e caso, lo wordo pidi pa e accionistanan y e consortio (financiadornan manera MCB Bank, APC Pensioenfonds y Vidanova Pensioen) acepta e deal cu interCaribbean y regle di tal forma cu e deal no ta den peliger. E deal ta encera cu interCaribbean ta cumpra InselAir international pa 1 dollar,  y ta pone 20 miyon florin disponibel pa un period di 9 aña, cu condicion cu bin un acuerdo di creditor. Pero pa e creditornan ta importante cu e accionistanan tambe aproba. Segun AD, nan aprobacion ta depende di e acuerdo cu e consortio. E acuerdo aki ainda no a keda cla y segun e matutino AD, te cu ayera, esaki tabata mal pega. Ta trata di e garantia cu e accionistanan a stipula. Nan lo kier 15% di e suma di 10 miyon dollar (casi 20 miyon florin). Financiadornan kier 35%. Ta trata e avionan geleased di e compania Best Value Great Care, cu no por a wordo bendi pasobra nan a para mucho tempo y nan balor a baha tambe. Banda di e acuerdo di percentahe cu e consortio, ta tambe e momento di pago. Y asina tin un cantidad di ‘problema’. Si e caso sumario no rindi un resultado positivo prome cu diamars 3’or, y pa tres or no tin un acuerdo, e posibilidad ta grandi cu huez por declara InselAir bancarota mayan atardi.