Ex premier Schotte ta tene su ultimo conferencia di prensa awe

WILLEMSTAD – Ex prome minister di Corsou y lider di partido Movimento Futuro Korsou (MFK) Gerrit Schotte ta tene su ultimo conferencia di prensa awe dialuna. Asina un invitacion pa e conferencia cu NoticiaCla a ricibi, ta bisa cu e titulo “ Ultimo deklaracion di Gerrit Fransisco Schotte na Pueblo di Corsou for di Cede di MFK”. E conferencia di prensa lo ta awe tardi 5’or na e cede nobo di e partido na Lindhbergweg # 39. 

ENTREGA SU MES?

No ta confirma si esaki ta nifica cu e lider politico ta preparando pa entrega su mes e siman aki na autoridad. Siman pasa Corte di Casacion a confirma e sentencia di Schotte den caso Babel (acusacion pa corupcion politico y labamento di placa) como final y definitivo. Cu esaki e tin cu bay prison pa 3 aña. Segun ley, e tin cu haci esaki despues di 8 dia, cu ta vence diaranson awor. 

CLEMENCIA

Siman pasa despues cu e sentencia di Corte di Casacion a bin, ministerio publico a mustra cu pa ley, no por detene Schotte pa por lo menos 8 dia despues cu e sentencia keda dicta. Ademas e sentencia mester keda presenta oficialmente na e sospechoso. Ainda tin e posiblidad pa clemencia, pa cual tin cu bin un decision di tanto corte como gobernador di e respectivo isla. Y tanten cu esey no ta cla, no por detene Schotte. A compronde inoficialmente cu e partner di Schotte, Cicely vd Dijs si a haci e peticion pa esaki, y e tin cu wordo trata prome cu den caso di vd Dijs e por wordo encarcela. Vd Dijs tambe su sentencia  keda confirma y a bira final den e mesun caso, pero den su caso, e sentencia ta menos esta 15 luna (den practica 9 luna kitando 6 luna condicional). Y mas aleu, su encarcelacion no tin prioridad aworaki,  mientras cu di Schotte si.