Minister cu carta pa Hospital pa cuminsa drecha e servicio

ORANJESTAD - Minister di Turismo, Salubridad Publico  Dangui Oduber a manda carta pa hospital cu e menshe pa ‘tuma accionnan concreto pa mehora servicio’. Den un comunicado pa prensa, e mandatario ta splica cu e ta preocupa cu e scarsedad di specialistanan na Aruba. Esaki tin como consecuencia cu e tempo di espera pa bay un specialista ta tarda entre 3 pa 6 luna. Verwijzing pa un specialista no por ta algo cu ta tarda. Oduber ta haña esaki un situation indeseabel, pero mas aun uno peligroso ora ta trata di salud di e pashent. Den e reunion di urgencia ultimo cu Minister Dangui Oduber tabata tin cu HOH y AZV Minister a urgi  gerencia di Hospital pa haci nan maximo esfuerso pa yena e vacaturanan aki lo mas pronto posibel. Pa e motibo aki Oduber por medio di un carta, siman pasa, ta manda pidi HOH un splicacion di con leu nan ta cu e “recruitment” di specialistanan na HOH. Ta urgi pa buska activamente specialistanan, preferibelmente Arubiano (yuinan di tera) den exterior y haci maximo esfuerso pa atrae nan pa Aruba. Den e carta aki Oduber tambe ta manda pidi gerencia di HOH pa duna Minister un splicacion di e procedura cu HOH ta encamina na momento di “recruit” y tuma un specialista den servicio di HOH. Ta conoci tambe cu e tempo di espera na Eerste Hulp ta sumamente largo. Akinan tambe Minister a pidi e gerencia di HOH un splicacion kiko ta e plan cu HOH tin pa reduci esaki.  Segun e mandatario, e pashent merece e mihor calidad di cuido y un di e indicatornan pa logra esaki ta pa reduci e tempo di espera pa wordo “verwezen” na un specialista y na Eerste Hulp.