Dialuna gobierno ta presenta fase 1 di reforma fiscal pa 2019

ORANJESTAD – Dialuna atardi gobierno ta presenta e prome parti di e reforma fiscal cu tin cu reemplasa e actual crisisheffing na 2020. Prome minister Evelyn Wever a mustra cu mirando e embergadura di e reforma fiscal, a parti desaki den tres pa 4 parti. E prome parti ta esun mas ‘personal’ cu ta toca e ciudadano. Esaki lo keda presenta dialuna cu e intencion di implementa na comienso di januari 2019 caba. Mester pensa riba inkomsten belasting, Loom Belasting y Grond Belasting. Segun Wever, esaki mester trece ‘alivio’ den comunidad. E mandatario no kier a comparti nada ainda di esaki, y a bisa si cu tin informacion circulando eyfo cu no ta corecto pasobra e cifranan y tabel no ta cuadra. 

PROME GRUPO

E intencion ta cu dialuna awor pa 3or di atardi, gobierno hunto cu personal di impuesto y douane presenta e tabelnan pa tur e impuestonan menciona di e prome grupo esta fase 1, y lo duna un splicacion cuanto esaki lo ta y kico tur ciudadano lo tin cu bay paga. A compronde cu tin gruponan cu no tin cu bay paga nada, debi na e cantidad di placa cu nan ta gana pa aña. Lo reparti e tabelnan di e respectivo brackets, y splica detayadamente cuanto tur lo paga. 

OTRO FASENAN

A mustra cu otro fasenan ta drenta na vigor mas despues. Entre nan, e parti cu tin cu reemplaza BBO, y converti esaki den un otro alternative manera BTW of otro cos. E parti aki (fase 2) lo keda introduci y presenta mitar di otro aña esta 2019.  Ta sigui cu e impuesto pa comerciante cu ta mas fin di 2019, comienso di 2020. Aki lo trata nan parti . Tambe ta sigui fase 3 cu ta e parti unda cu ta ta presenta e reforma fiscal pa loke ta e documentacion/formulario. E intencion ta pa haci esaki mas facil pa e cliente yena, menos complica y menos informacion posibel pa no dificulta e proceso. Pues un forma mas simplistico.  E ultimo fase ta e parti di turista unda cu lo implementa cierto cambio di impuesto pa turista, manera cambio den roomtax y tambe carrental etc. Esey gobierno tin pensa di implementa mitar di 2020.