Dos diferente protesta planea diabierna mainta

ORANJESTAD – Tin indicacion cu diabierna mainta por surgi un confrontacion di dos grupo net dilanti di gabinete di gobernador. Simpatizantenan di tanto premier Mike Eman, como di e ‘grupo di 7’ ta wordo solicita pa ta presente diabierna mainta dilanti gabinete di gobernador. Uno pa protesta contra gobernador pasobra e no a firma presupuesto y e otro pa defende gobernador pa e mesun hecho. No ta conoci si ambos a pidi permiso pa haci tal, ni si ta necesario pa tin permiso pa un protesta asina, sea pro of contra.

Den curso di diahuebs merdia, a cuminsa compronde cu gobierno di Aruba tabata organisando un tipo di protesta diabierna mainta dilanti di gabinete di gobernador di Aruba. Esaki mester ta pa sostene prome minister Mike Eman cu tin un cita confirma cu gobernador pa 10’or. Riba e pagina di facebook di minister Alex Schwengle, por a mira un poster cu ta pidi pa ‘hunto demostra cu presupuesto mester wordo firma’. Cu un backdrop di bandera di Aruba bulando, a pone e ora y lugar (9’or am) cu un hashtag ‘ta basta’.

 Den oranan mas trempan, durante un programa radial na e emisora Canal 90, por a tende oyentenan basta rabia contra gobernador y eynan tabatin invitacionnan tambe pa sostene premier Mike Eman ora cu e acudi na e despacho di gobernador.

Mes momento e conocido ‘Grupo di 7’ cu ta consisti primordialmente di 7 persona, sostene pa un grupo mas grandi, a informa cu nan tambe ta bay gobernador su despacho, pero pa mas bien proteha y defende gobernador. Nan tin un reunion planea diahuebs anochi pa organisa tur cos bon pa diabierna.

Partido di oposicion MEP di otro banda, pa medio di un anuncio riba e facebook page di nan lider, Evelyn Wever Croes, a informa cu contrario na pensamento inicial, partido MEP lo no forma parti di e protesta aki, ya cu ‘un gobierno cu ta lanta su hendenan pa bay manifesta contra gobernador formalmente, ta ekiboca’. E ta considera cu lantamento di un pueblo contra un pueblo ta un crimen. Den pasado si, MEP a sostene e grupo di 7, den protesta y/of manifestacionnan anterior. Esaki a pone cu rapidamente partido AVP a cuminsa liga e ‘grupo di 7’ como un splinter di partido MEP.

NoticiaCla no por a verifica si tin un permiso otorga pa polis pa un protesta manera cu tin planea pa tuma lugar diabierna mainta, ni si esaki tambe ta necesario. Hecho ta cu pa medio di social media, ta purbando di yama simpatizantenan di gobierno pa sostene premier Eman na su cita.