Parlamento no por cambia e contenido di protocol firma entre Aruba y Hulanda

ORANJESTAD – E protocol cu gobierno di Aruba y Hulanda a firma, no por wordo cambia door di Parlamento. Asina prome minister Evelyn Wever Croes a bisa NoticiaCla, riba pregunta di e portal cu si Parlamento por haci cambio awor cu e protocol ta firma . Segun Wever, ora cu e protocol bay Parlamento awor, e ta bay meramente como informacion. Pero mes momento Wever a bisa cu esaki ta pasobra e protocol su contenido no ta mara Parlamento den ningun forma. “Si e protocol tabata mara Parlamento, ta importante pa nos a consulta cu Parlamento delanta” Wever a sigura e portal aki. “Pero durante di negosacion nos a haci duidelijk y cla, pa tur loke cu Hulanda tabata kier pa mara Parlamento, nos sak’e afo” e mandatario a sigura e portal aki. Y tabatin varios intento di Hulanda pa haci tal, segun e prome mandatario.