Gobierno na CAFT: No por sigui e ultimo dos recomendacionan

ORANJESTAD – Mientras cu gobierno di Aruba ta siguiendo recomendacionan di e colegio di supervision financiero di Aruba CAFT, e dos ultimo recomendacionan si gobierno no por haci. “No ta cu nos no kier, pero nos no por” Prome minister Evelyn Wever Croes a bisa NoticiaCla como prome reaccion riba e carta di CAFT di e siman aki. E ta referi na e carta di CAFT e siman aki, piendo pa tuma aun mas medida e aña aki ainda pa 2018, no gasta e 35 miyon florin destina pa e fondo di Crisis Plan. Wever a bisa e portal aki cu diahuebs a sali un carta pa CAFT cu e contesta aki. Minister di Finanza Xiomara Ruiz Maduro mientrastanto a bisa NoticiaCla diahuebs atardi cu ora cu e bolbe di su biahe di trabou na Colombia, e lo atende cu e asunto aki y reacciona pa NoticiaCla.

TERCO Y CONFRONTACION

Segun Wever, nan a practicamente sigui tur e consehonan di CAFT. Aworaki sinembargo no ta cuestion cu gobierno ta ‘terco’. A mustra cu CAFT su trabou enberdad ta pa duna conseho, y gobierno a splica pakico no por sigui e conseho. “Esey mes ta e base pa momento cu Rijks Ministerraad mester bay tratele, kico na ta bay tuma como decision”. A puntra e mandatario si e no ta creando un confrontacion cu CAFT y Hulanda door di no tuma e ultimo dos consehonan aki. “Mi ta duda cu tin un hende riba e planeta aki cu ta interesa pa un confrontacion riba 2018 cu ta pasando, y cu nos ta dentro di nos budget” Wever a sigui bisa. E mandatario no ta kere cu e situacion aki lo trece un intrankilidad entre Hulanda y Aruba. 

SO BE IT

Si CAFT sigui insisti cu gobierno, no obstante e hecho cu ta mustra CAFT cu no por tuma e ultimo dos consehonan aki, y dicidi di manda un conseho negativo pa Rijks Minister Raad cu por conduci den un ‘aanwijzing’ of instruccion, ‘So be it!”, Wever a bisa. “So be it, mi no por kibra hero cu man” Wever a bisa finalmente. E ta mustra cu e no por bisa ambtenaar na December ‘Mi no por pagabo’. 

RECOMENDACION DI CAFT

Tabata e siman aki cu NoticiaCla a raporta den forma di primicia riba e conseho ultimo cu CAFT a presenta e siman aki na gobierno riba e raportahe di e di 3 cuartal di 2018. Basa riba e raportahe di gobierno, CAFT a recomenda pa tuma aun mas medida. Entre nan evita di usa un suma presupuesta pero no usa ainda. “Tin espacio pa tuma medida pa reduci e deficit di 2018” e colegio a bisa. Segun CAFT, nan ta mira cu ta posibel pa ainda logra reduci e deficit, contrario na pensamento di gobierno, cu a bisa cu no ta posibel pa haci mucho mas. E rapport aki CAFT di 6 pagina a manda dia 26 di november ultimo pa gobierno di Aruba y a keda publica awe riba nan portal.   Un punto cu CAFT ta remarca cu “compara cu añanan anterior, e aña aki Gobierno a keda sera compromisonan financiero despues di oktober. Anteriormente tur aña tabata sera e administratie nan oktober. Fuera di esey, CAFT ta nota cu a sobra un suma cuantioso di 35 miyon, presupuesta pa haci inversion pero cu no a wordo usa ainda faltando tres luna prome cu aña caba. Cu esaki CAFT ta sugeri pa no usa esaki den e ultimo tres luna, y asina ‘depresupuesta’ esaki pa por yuda baha e gastonan.