Kiwanis Club of Aruba a celebra Dia Universal di Derecho di Mucha

ORANJESTAD -  Riba dia 20 di november mundo henter a conmemora y celebra Dia Universal di Derecho di Mucha y en conexion cu e dia aki, Kiwanis Club of Aruba a invita 50 mucha di diferente districto di Aruba, pa un celebracion di Kiwanis cu e tema di “Little Chefs”. E tour a cuminsa mainta tempran, caminda e bus di De Palm Tours a busca tur e muchanan y hiba nan bishita diferente punto turistico. E meta tabata pa e muchanan conoce un poco di e trabou di chef como tambe e siguridad ora di cushina. E muchanan tabatin e oportunidad di bishita nos atraccionnan turistico y alabes pasa un mainta dibertido, yena cu alegria y sorpresa cu e miembronan di Kiwanis Club of Aruba a prepara specialmente pa nan.

E prome punto cu e muchanan a bishita tabata Moomba, caminda nan a ricibi delicioso desayuno. E di dos atraccion cu e muchanan a bishita tabata Santa Rosa, Hofi di Chabelito “Kinderboerderij”. Aki sr. Ludy Rasmijn a duna informacion y splicacion di e importancia pa planta fruta y berdura. Pa conmemora e dia di Derecho Universal di Mucha, e muchanan a planta un mata di mango. E mata a haya nomber di Kiwanis y lo sirbi pa den futuro duna fruta y sombra na hopi di e muchanan cu lo bishita e Hofi di Chabelito.

Despues e muchanan a bishita EPI Hospitality and Tourism Restaurant unda nan a wordo ricibi pa e studiantenan voluntario di “Student Council” bisti den e uniform di chef.

E muchanan a haya un recorido den e cushina y Meneer Raymond,  cu ta un docente na EPI, a siña e muchanan di e importancia pa mantene un cushina limpi. E parti di siguridad den cushina tabata na encargo di Sr.  Francis Toussaint di Brandweer, cu a duna un charla y conseho educativo na e muchanan tocante siguridad den cushina.  Despues di e charlanan e muchanan a traha nan propio pizza bou di supervision di e chefnan y e miembronan di Kiwanis Club of Aruba pa siguientemente diberti nan mes cu pintamento. 

Durante e dia e muchanan a ricibi: awa, juice, sandwich, fruta, juice di tamarijn y lamunchi, donuts y cupcake. Na final di e dia e muchanan a ricibi un “surprise bag” yena cu articulo manera, entre otro; tayo, cuchara, cup pa bebe awa, handsanitizer, chips, mangel y buscuchi.