Ricardo Croes: Legalisacion di cannabis medicinal ta na caminda

ORANJESTAD - Legalisacion di cannabis medicinal na caminda . Asina lider di e partido politico den coalicion Ricardo Croes ta bisa den un comunicado. E partido durante ultimo eleccion a usa esaki como e cabay di campaña y a logra genera asina suficiente voto pa drenta Parlamento na 2017.  Croes como lider di fraccion, ta promove e uso medicinal di cannabis den e programa di Gobernacion. Y e siman aki el a anuncia cu 1 di december proximo un conferencia lo tuma lugar cu cannabis medicinal como topico. 

LEGALISACION CANNABIS

E legalisacion di cannabis medicinal ta un punto importante di e programa di partido RED Democratico y ta mustra cu RED lo logra esaki. Mientras tanto un comision di gobierno “Commissie legalisering van medicinale cannabis” a wordo instala. Tur hende sa cu na Aruba e promotor pionero tras di legalisacion di cannabis en general ta Ricardo Croes. Den e acuerdo di gobernacion tin poni cu e gobierno lo encamina e proceso di legalisacion di cannabis medicinal. Cu e conferencia aki e uso medicinal di cannabis na Aruba ta wordo enfoca y cu esaki Ricardo ta gana sympatia riba tereno nacional y internacional.

INTERNACIONAL

E legalisacion di cannabis medicinal ta mundialmente un echo, por ehempel na Uruguay, Jamaica, diferente estadonan Mericano (manera Denver Colorado, California, Atlanta, Washington y varios mas), Puerto Rico y diferente paisnan Europeo (manera Hulanda, Spaña, Alemania etc. Alemania a pidi Hulanda pa aumenta e exportacion di cannabis medicinal pa Alemania). Ta parce cu Aruba a keda atras riba e tereno aki pero danki na e tremendo esfuerzo di sr. Ricardo Croes, RED Democratico y tambe e coalishon na mando, e legalisacion di cannabis medicinal lo bira un realidad. Pa conclui cu palabranan di sr. Ricardo: “Si nos por salba of mehora e calidad di bida di un patient cu ta sufri di un enfermedad chronico of terminal, ken nos ta anto pa kita su derecho pa usa un remedi alternativo cu a prueba caba cu e ta traha, door di prohibi esaki? E prohibicion di cannabis ta un acto ilicito contra e derecho di bida, ancra den e derechonan humano. No un, pero hopi patientenan internationalmente ta disfrutando di e beneficionan cu cannabis medicinal ta ofrece, como por ehempel MS patientenan, personanan cu tin cancer etc.”  

E CONFERENCIA

Pa loke ta e conferencia, segun Croes remedi ta e number di e prome Conferencia Internacional tocante cannabis medicinal den e Islanan Hulandes. Oradornan internacional y renombra ta splica e importancia di cannabis pa usonan medicinal segun Croes. Señora Piedad Córdoba, ex-candidato presidencial y ex-senador di Colombia; Dr. Suzanne Sisley, presidente y investigador principal di e Scottsdale Research Institute; Dr. Juan Luis Castro, psychologo y senador di Colombia; señor Gen. Wesley Clark consehero humanitario y economico y ex-candidato presidencial mericano, lo ta presente. Tambe lo ta presente señor Robert Y. Lee, CEO di American Patriot Brands, y presidente actual di Puerto Rico One. Miembro di Parlamento Ricardo Croes y Ministro Dr. Rudy Lampe tambe lo ta oradornan.  RED Democratico ta enfatisa e necesidad pa legalisacion di cannabis medicinal despues di a testigua diferente casonan exitoso di personanan hopi enfermo cu a recupera door di hasi uso di cannabis medicinal. Segun Croes, no ta existi ningun duda riba e poder preventivo, curativo y terapeutico di cannabis.