Multa miyonario contra Mota Engil parse a duna su resultado!

ORANJESTAD – Ta parse cu e multa di 2 miyon florin cu gobierno di Arub a impone riba e compania di construccion Mota Engil ta dunando resultado. Diripiente a mira un cambio drastico di actividad riba parti di Watty Vos Boulevard entre rotonde di FCCA y esun di Cumana e siman aki. Cantidad di persona y ekipo ta mobilisando te den oranan lat di atardi, incluyendo fin di siman. No ta conoci ki dia awor lo termina e parti ey, pero por lo menos awor tin movecion continuo. E deadline a vence varios biaha y e ultimo tabata September. Awor nos ta na fin di November pero no ta mustra cu pa awor e parti aki lo termina. 

DEADLINE

E trabou aki cu ta e comienso di e proyecto, mester a keda cla basta tempo atras, pero a dicidi cu ta duna nan 6 luna pa caba e trabou cu mester tabata na augustus. Sinembargo ora cu augustus a yega, a bisa cu a haya mas contratiempo, cu entre otro un duiker. Ora cu esey a keda cla a resulta cu tabatin un otro duiker cu mester a drecha. Awor a keda cla cu esey, pero awor ta trahando riba e caminda na banda bayendo direccion Kooyman. Pa no papia mes di e rotonde na Cumana unda cu esaki tambe a conoce varios cambio di trafico, cu no a keda anuncia. Director di DOW Marlon Croes den un entrevista exclusivo cu NoticiaCla a admiti cu mester a duna mas informacion porta. A splica e cambionan y cu ta parti di un proyecto grandi.

KICO FALTA

Ainda falta pa completa e viaducto despues di e rotonde banda di ex Condemsa, cu ta e motibo pa cual e rotonde tin un subida, pa asina e conecta cu e viaducto. Unabez cu esey ta cla, lo habri e rotonde su vianan y elimina e asina yama 'sergeantstrook' cu a pone temporalmente pa dirigi trafico den un forma mas sigur.