Mester warda 8 dia prome cu por encarcela ex premier Schotte

WILLEMSTAD – Awor cu Corte di Casacion a confirma e sentencia di tanto ex premier di Corsou Gerrit Schotte como su pareha Cicely vd Dijs diamars mainta, ministerio publico mester ehecuta e sentencia. Pero NoticiaCla a compronde cu esaki no por sosode prome cu 8 dia desde cu e sentencia a cay, y ta conta primordialmente pa Schotte, ya cu su sentencia tin prioridad. Esun di su pareha no, pasobra e castigo ta menos cu 24 luna. A compronde di e vocero di ministerio publico cu tin dos trayecto cu ta canando y lo haci esaki di un forma corecto. 

E SENTENCIAProme cu tur cos, ministerio publico mester presenta e pareha en cuestion formalmente cu e sentencia, conforme ley. Pero cu e ehecucion di e sentencia, tin cu tene cuenta cu articulo 610 di Codigo di Procedimento Penal cu ta stipula cu e comienso di e castigo, ta wordo suspende 8 dia despues di e sentencia. Pesey tabata importante cu OM a pidi huez durante e tratamento di e caso, pa asina cu e sentencia cay, detene Schotte y vd Dijs mesora. Huez a rechasa e peticion aki e tempo ey. Awor por detene e pareha, pero no durante e proximo 8 dia. Un otro factor ta si tin espacio den cel pa e detencion. Y finalmente, e orden den cual e detencionan tin cu tum lugar. Esaki ta a base di prioridad, unda cu den e caso aki manera indica caba, Schotte su detencion tin prioridad y mas urgencia, compara cu esun di su pareha, basa riba e largura di e detencion.