Prome minister Hulandes Mark Rutte na Aruba na januari 2019

DEN HAAG/ ORANJESTAD – Prome minister di Hulanda Mark Rutte lo ta na Aruba na januari 2019. Pa ta exacto, Rutte lo ta di bishita pa un solo dia, esta dia 22 di januari proximo. Asina NoticiaCla a confirma for di Hulanda. Rutte su bishita principal ta pa e congreso na Corsou titula 'Bon Bini for Business', cu  prome minister di Corsou Eugene Rhuggenaath a confirma durante su bishita na Hulanda siman pasa. NoticiaCla tabata warda confirmacion di e fecha exacto. Hunto cu Rutte, lo acompañe minister di Husticia Ferdinand Grapperhaus y secretario di estado Hulandes Raymond Knops. E mandatario lo bishita Gobernador, Prome minister di Aruba y posiblemente algun sitio no confirma ainda. 

ULTIMO BISHITA

E ultimo bishita di Rutte tabata na 2013, specificamente dianan 13 y 14 di juli, durante un bishita pa fortifica relacionan economico den Reino. Durante su ultimo bishita, el a bishita prome minister di e tempo ey Mike Eman y Gobernador di e tempo ey Fredis Refunjol. Ademas, hunto cu un grupo di invitado di cual prensa tambe tabata invita, a haya un recorido y a bishita entre otro refineria Valero, e parke di Molina na Vader Piet y Warda Costa. 

COLOMBIA

Diaranson e mandatario ta inicia un bishita di dos dia na Colombia, pa despues sigui pa Argentina diabierna pa e cumbre di paisnan G20. Durante e bishita aki, minister di finanza di Aruba Xiomara Ruiz Maduro ta acompañe. NOTA. Potret ta di Mark Rutte durante su ultimo bishita na Aruba na 2013 y ta cortesia di ANP.