Cabesante di scol: alumno cu a cay for di dos piso no a wordo pusha

ORANJESTAD – E alumna cu a cay for di dos piso di Maria College Mavo dialuna, no a wordo pusha, y no tabatin ningun wega andando. Cabesante di e scol, Roseanna M Garrido a reacciona diamars publicamente riba e caso, pa evita cualkier  speculacion riba e incidente. Mes momento e cabesante ta sigura cu e alumno ta for di peliger.

Loke a pasa segun e cabesante ta relata pa medio di un carta (lesa e carta aki) ta cu " dialuna mainta, ora bel a bati 10 or, un alumno a bula riba e balustrada y keda colga y a cay for di segundo piso". “ E alumno no a wordo pusha y no tawata tin ningun wega andando”, e nota di e cabesante ta sigui bisa. “ Mesora un par di alumno y docente na e prome y segundo piso a bati alarma di e sucedido lamentabel aki y a duna e alumno prome auxilio. Inmediatamente polis y ambulance a presenta na e sitio y ambulance a transporta nos alumno pa hospital”

“Segun ultimo informe nos alumno ta for di peliger. “Slachtofferhulp” lo guia nos docente y alumnonan den e momento dificil aki. Nos ta desea nos alumno un pronto recuperacion y tine den nos oracion” e carta ta sigui bisa.

Tabata dialuna mainta cu competente a cuminsa cu e investigando e caida di e alumno di Maria College Mavo dialuna mainta, pa sa kico e motibo exacto ta. E notificacion tabata cu "un alumno femenino a cai for di e di dos piso di e scol, y herida su mes formalmente na su lomba y barica". Mesora tabatin varios version pa e caida, cu ta varia den intento di pone fin na bida, te na pushamento y hungamento. Awor pues e cabesante a confirma cu nada di esey no tabata e motibo real di e caida.  E hecho ta keda cu e persona a keda herida y a wordo transporta pa hospital. Riba potret por mira e piso di unda e persona lo a cay, mientras otronan ta mustra e momento cu personal di ambulance ta transporta e alumno paden di Eerste Hulp.