Wever: Protocol di LAFT no ta mara Parlamento den ningun forma

ORANJESTAD – Protocol firma no ta mara Parlamento den ningun forma. Esaki y mas prome minister Wever a splica NoticiaCla diabierna despues cu a bira conoci cu e firmamento di e protocol a tuma lugar. E firmamento mes di protocol di LAFT entre gobierno di Aruba y Hulanda, a bin como sorpresa pa hopi. Mientras cu tin speculacion kico por a pone esaki sosode asina repentino, den un reaccion pa NoticiaCla, prome minister Evelyn Wever a bisa e porta l aki cu e no sa. “Kiko a pone Hulanda firma,mi no sa. Nos tin basta tempo den negosacion. Y no tin nada nobo aden”. Algo cu despues minister Ruiz di finanza a confirma den un comunicado”   Despues di algun dia intenso di negociacion, Aruba y Hulanda a firma un protocol, cual ta basa riba e maneho di Gabinete Wever-Croes di deficit y gasto di personal” Ruiz a bisa den un comunicado. Pero segun Wever su comentario na e portal aki, e ta kere cu nan kier a duna gobierno tempo pa wak kiko nan mes ta hasi. “ Y awor tabata ok a firma” Wever a bisa.  

PODER DI PARLAMENTO

Un di e problemanan cu parlamento (lesa: fraccion di MEP) tabatin cu e asunto semper, ta e metemento di CAFT y LAFT den Parlamento y purba di kita e autonomia cu Parlamento tin. Como tal NoticiaCla a puntra Wever riba esaki. Segun Wever, e no a mande pa Parlamento prome. “Pasobra e palabracionnan no ta mara Parlamento den ningun manera” Wever a sigura e portal aki. “Ademas loke locual ta palabra ta locual mi a informa Parlamento varios biaha riba e negosacionnan y normen nobo cu Parlamento hasta a aproba den un mocion di 4 sept 2018” Wever a sigui bisa. Na e portal aki algun luna pasa, secretario di estado Raymond Knops a bisa cu ta keda na Wever con e ta bende e contenido di e protol na Parlamento, indicando cu unabez cu e ta firma, no tin cambio mas. 

GOBIERNO NO TA CUMPLIENDO

Un di e kehonan e siman aki ainda di CAFT su analisis di e presupuesto supletorio 2018 di pais Aruba, ta cu gobierno di Aruba no ta cumpliendo cu palabracionan haci. Y den e protocol ta haci mencion cu aruba lo cumpli. Riba esaki Wever a bisa e portal aki cu esey no ta corecto. A mustra cu CAFT tabatin cifranan robez cu gobierno despues a coregi. Problema segun Wever ta, cu CAFT ta sigui usa e prome version di e plan di FEM. “ Asina cu nos a mira e fout, nos a cambie pero nan no kier a cambie mas den nan uitgangspunt” Wever a bisa, refiriendo na CAFT. Como tal pesey CAFT ta bisa cu no tin cumplimento, siendo cu gobierno ta mustra nan cu esey no ta e caso.

FUTURO RELACION CAFT

E hecho cu gobierno a anuncia cu kier evalua e forma di traha di CAFT, ta pone cu esaki posiblemente por tin un efecto riba e relacion entre CAFT y gobierno. A puntra e mandatario kico esaki kier men pa e LAFT nobo, si tene esaki on hold tanten y  con lihe e investigacion aki lo tuma lugar y pa ki tempo e mester ta cla?. Riba esaki Wever a bisa e portal aki cu riba e tempo di evaluacion di CAFT, mester haci palabracion ainda. “ Awor e prome cambio cu gobierno kier den LAFT ta e normen nobo. Nada mas. Esey ta mas urgente awor” Wever a bisa riba e tema ey. 

WITTE DONDERDAG ACCOORD

Prome minister a bisa diabierna mainta cu un di e cosnan cu nan no a logra, ta pa convence Hulanda pa yuda Aruba cu inscripcion riba Mercado internacional pa haya prestamo na interes mas abou. Esaki lo sosode te ora cu Aruba logra un surplus, cu ta poni awor pa 2020. Wever a confirma esey, y a bisa unicamente “Nos ta lamenta. But it is what it is”. 

CON A PARA CU E  RECOMENDACIONAN PA 2018

Entre e preguntanan tambe a bin e adaptacionan cu CAFT a haci cu gobierno di Aruba, pa e.o. paga 14.2 miyon extra pa fin di e aña aki y e otro 11 miyon. Riba esaki, Wever a bisa cu e protocol no ta trata esey, sino ta riba e normanan di 2019. Pa loke ta 2018, minister di finanza  Xiomara Ruiz ta papiando cu CAFT riba e tema ey.