Debi na dessatisfaccion cu CAFT, gobierno kier investiga e colegio aki

ORANJESTAD /DEN HAAG – Gobierno di Aruba no ta bay tuma conseho di CAFT sin mas den futuro. Esaki tabata e mensahe di prome minister Evelyn Wever Croes durante un mensahe pa comunidad awe mainta riba firmamento di protocol riba tereno di finanza. Mientras cu a menciona cu a bay di acuerdo cu CAFT ta sigui opera pa 3 aña, Wever a sigura cu ‘Gobierno di Aruba ta bay evalua e funcionamento di CAFT’, y a confirma cu tin ‘desatisfaccion di gobierno di Aruba riba con e supervision a tuma lugar den ultimo añanan”. E siman aki ainda CAFT a publica su reaccion negativo riba e presupuesto supletorio di gobierno pa 2018. 

INVESTIGACION

Mirando e desatisfaccion cu tin di parti di gobierno di Aruba riba con e supervision a tuma lugar ultimo añanan, gobierno di Aruba ta bay evalua e funcionamento di CAFT den e ultimo añanan y kico ley ta stipula, kico nan a haci, kico nan no a haci. Esey ta bay wordo haci pa un instituto independiente. Ya caba den pasado, algemene rekenkamer di Hulanda a haci un evaluacion di CFT pa loke ta e islanan BES. Den e direccion ey nos ta bayendo. A palabra cu CAFT lo keda pa e proximo 3 añanan, mientras cu Aruba ta cuminsa traha riba e begrotingskamer , cu tin cu reemplaza Caft e momento eynan. Pero claro e condicion ta cu nos ta cumpli si cu nos palabracion financiero.