Cu firmamento di protocol, CAFT a haya aun mas autoridad awor

ORANJESTAD – Mientras cu gobierno di Aruba a splica diabierna cu firmamento di e protocol cu Hulanda diabierna ta duna nos un periodo di trankilidad, realidad ta tambe cu e protocol a duna CAFT aun mas ‘poder’ of ‘autoridad’. Den e parti III di e protocol, tur e puntonan aki ta keda ilustra. Si antes CAFT por a funciona a base di un LAFT so, awor e tin un protocol pa cay ariba pa ‘toets’ e funcionamento di gobierno su finanzas. 

PODER

Entre e puntonan, CAFT ta sigui funciona por lo menos 3 aña mas. Y mientras cu gobierno ta fiha e ley di LAFT, esaki ta sosode despues cu Conseho di Minister di Reino aproba esaki. Algo cu minister presidente Wever a confirma pa NoticiaCla, argumentando cu esaki ta data caba for di 2015 ora cu gobierno anterior a bay di acuerdo. Y esaki no por a wordo cambia den e LAFT nobo pasobra e unico cos cu por cambia, ta e norma cu tin riba cual CAFT tin cu ‘toets’ e situacion. Si dado caso e ley di LAFT no pasa na tempo, CAFT ta usa e palabracionan haci, y a base di e protocol, por dicidi kico ta haci cu Aruba pa cu e cumplimento. Pues, si antes tabatin solamente un LAFT, awor por actua via protocol tambe y por cay bek semper riba esey. Pa loke ta evaluacion di CAFT, a compronde cu esaki lo bin despues cu ambos partido haci algun palabracion. Lesa e protocol AKI.