Contenido di protocol entre Aruba y Hulanda ta conoci!

DEN HAAG/ORANJESTAD – E contenido di e protocol entre Hulanda y Aruba valido di 2019 pa 2021 ta conoci. E ta trata un documento di 10 pagina cu ta toca varios tema, incluyendo e futuro di CAFT pa Aruba pa e proximo añanan. Mientras cu prome minister di Aruba Evelyn Wever a splica e contenido den liñanan grandi, tin puntonan interesante cu awor tambe a bira conoci pa un y tur. Loke NoticiaCla a compronde, ta cu contrario na gabinete anterior hopi punto cu e gobierno e tempo ey a rechasa y/of evita pa bay di acuerdo cu ne a base di puntonan constitucional, e gabinete aki (Wever-Croes), si a acepta. 

MEDIDA EXTRA

Den e parti di ‘regla di presupuesto’, Aruba ta bay di acuerdo pa tuma medida addicional riba termino mediano y largo pa structuralmente reduce e gastonan di personal. Loke ta interesante ta cu mientras cu minister di Finanza Xiomara Ruiz Maduro a bisa cu ta ora cu tin un surplus, ta usa e suma extra pa cubri debe nacional, y no ora cu tin un deficit. Den e protocol sinembargo, Aruba ta bay di acuerdo cu e hecho cu ‘en caso tin un entrada ‘inespera’, den tempo di un deficit, esaki ta bay 100% pa cubri e deficit. Algo cu den pasado, mayoria di Parlamento, a desaproba den un mocion na april di 2018. 

CAFT

Un paragrafo completo ta dedica na e situacion di CAFT, unda cu ta confirma declaracion di premier Wever, cu CAFT ta sigui opera 3 aña mas te cu 2021. Pero loke ta bira conoci awor ta cu ta condiciona cu mas tarda 31 di December 2018 gobierno mester entrega un concepto di ley di e cambio na Parlamento di Aruba. E unico cambio ta bira e adaptacion di e articulo 14 di e LAFT actual cu ta regarda e normanan. E ley nobo di LAFT mester drenta na vigor prome cu 1 januari 2019, pero no prome cu Conseho di Minister di Reino aproba esaki. Esey kier men cu Hulanda tin ultimo palabra riba esaki toch. Si dado caso e LAFT adapta no a drenta na vigor prome cu tramento di presupuesto (2019), lo usa e palabracionan di e protocol aki como instrumento pa CAFT haci su evaluacion. Na 2021 lo evalua e situacion financiero di Aruba, y pa 1 di September 2021 mas tarda, mester tin un decision riba e resultado. Basa riba e resultado aki, Hulanda lo dicidi si Hulanda lo asisti Aruba cu inscripcion pa haya interes mas abou riba prestamo internacional, conforme e acuerdo di mei di 2015. 

BEGROTINGSKAMER

E punto interesante di e begrotingskamer (anuncia tambe pa Wever), ta cu Hulanda lo no tin miembro  den e kamer aki,  pa asina Aruba tin su autonomia total riba dje. Lesa e protocol completo AKI.