Posibel legalisacion cannabis medicinal trata durante conferencia di remedi

ORANJESTAD – E posibel legalisacion di cannabis medicinal a keda trata como un topico durante e prome conferencia di remedy na Aruba recientemente. E conferencia aki a wordo organisa door di Ministerio di Salud Publico y Inspectie Volksgezondheid Aruba pa motibo cu e paisnan den Caribe ta topa cu varios reto similar riba e tereno di remedi. Pues, trahando hunto lo por yega na solucionnan cu ta benificia tur pais. Bou di e invitadonan tabata tin entre otro delegadonan di e cuater ministerionan di salud publico, delegadonan di e inspeccionnan di salud, boticarionan di hospital y miembronan di e comision di registracion di remedi. 

REGISTRA REMEDI Y INTRODUCCION CANNABIS MEDICINAL

Durante e conferencia a discuti entre otro con pa haci e proceso di registracion di remedi mas eficiente y e opcionnan pa baha e gastonan di remedi cu ta wordo importa door di hospital. Un otro topico riba e agenda tabata e posibel legalisacion di cannabis medicinal riba e diferente islanan. Pues, e paisnan a intercambia idea y experiencia y a discuti e posibel reto y solucionnan cu e introducion lo por trece cun’e. 

PROME BIAHA

Esaki ta prome biaha cu a organisa un conferencia di remedi y IVA y Ministerio di Salud Publico a keda satisfecho cu e participacion fructifero di e delegadonan. E conclusionnan di e conferencia aki lo wordo entrega den un documento na e ministernan di salud publico di e cuater paisnan pa asina nan por sigui desaroya e puntonan di accion den nan siguiente reunion na mei 2019.