Wever riba carta CAFT: Gobierno a haci tur loke e por a haci

ORANJESTAD – Gobierno di Aruba a haci tur loke ta humanamente poibel financieramente, y no por haci mas. Asina e prome minister id Aruba Evelyn Wever a bisa como un ‘follow up’ riba su prome reaccion di ayera riba e carta cu e colegio di supervision financiero CAFT a bisa e siman aki. E mandatario ta conciente cu den e dianan aki tin hopi comocion entorno un carta di Caft cu a sali publica. 

POSICION DI CAFT

Wever-Croes a duna su reaccion riba esaki :“Mi a anuncia e posicion di Caft aki basta dia caba. Cu nos ta satisfecho cu nos a logra mantene e deficit di 2018 cu Parlamento a aproba” Wever a sigui bisa. Segun e mandatario, Parlamento a aproba un deficit di 149 miyon pa 2018, y ta mustra cu pa fin di aña e lo ta 147 miyon. “Pues nos ta dentro di e norma y esey ta e meta di e ley di Caft. Manera mi a anuncia siman pasa caba den conferencia di prensa, Caft ta di un banda satisfecho cu nos a mantene e deficit, pero di otro banda kier pa nos hasi mas”. Algo cu gobierno a bisa awor cu no por.  

GASTO DI PERSONAL

“ Mesora mi a bisa tambe cu nos no por hasi mas na e momentonan aki. Nos a hasi tur locual ta humanamente posibel y awor no por hasi mas. Pa otro aña nos por cuminsa mira e resultadonan berdadero di nos maneho y manera ta stipula den e presupuesto, e gastonan ta baha pa prome biaha cu 6 miyon florin” e mandatario a sigui bisa. 

DIALOGO CU HULANDA

Wever a sigui bisa cu mientras tanto e ta sigi den dialogo cu Hulanda pa mustra nan riba nos maneho. “ Nos mes a stipula un maneho cu ta realistico, nos tabata transparente den tur cos y no a gaña, y esaki mester forma e base pa confiansa” Wever a bisa. “ Awe mi a reuni cu Secretario di Estado (Raymond) Knops riba e tema financiero. E reunion a bai bon, y e tambe ta realisa cu Aruba ta hasiendo hopi esfuerso pa stabilisa finansas di nos pais” . Tocante e posicion di Caft: manera mi a bisa, mi no ta preocupa. “ Caft tin su rol y responsabilidad, un rol cu nan a faya den dje ultimo añanan”. “Nos tin nos rol y nos responsabilidad y nos si no kier faya den esaki. Den tur nos decisionnan nos ta pone e ser humano prome. Mi tin tur confiansa cu nos ta sali afo”  Wever-Croes a finaliza bisando.