Dr Joyce Pereira ta e prome doctorado den Papiamento pa islanan ABC

WILLEMSTAD/ORANJESTAD - Dr. Joyce Pereira a promove diahuebs 15 di november 2018 na University of Curacao (UOC) cu su tesis titula “Valorization of Papiamento in Aruban society and education, in historical, contemporary and future perspectives” na un forma fenomenal y impresionante den aula di Universidad.

Dr. Joyce Pereira ta e prome promovendus na UOC y e prome cu a dedica su tesis na investigacion di historia y balorisacion di Papiamento. 

Contenido di e tesis ta resultado di añanan di investigacion di posicion di idioma Papiamento den sociedad den curso di tempo y den e sistema educacional na Aruba .

Meta di e defensa tabata pa contesta pregunta tocante e.o. actitud di hende na Aruba relaciona cu idioma, derecho di idioma, vision educacional  y experiencia y respet pa propio identidad y tur esaki pa  por formula y implementa un maneho di idioma cu ta cuadra mas miho cu e necesidad y aspiracion di e pueblo di Aruba.

Den e defensa di e desertacion tabatin pregunta skerpi na Joyce Pereira door di e catedraticonan presente. E catedratico di ciencia huridico a haci e.o. e pregunta si di berdad Joyce Pereira ta para tras di e ponencia cu ta un crimen si un mucha no ricibi enseñana den su propio idioma. E pregunta aki a keda contesta magistralmente y cu ehempelnan di Proyecto Scol Multilingual(PSML) na Aruba. Riba e pregunta si ta recomendabel pa uza Papiamento ora di siña Hulandes como idioma stranhero, el a reacciona cu ehempel di practica mustrando cu ora tin parecido entre palabra den diferente idioma, mustrando e mucha riba esaki ta facilit’e den siñamento di e idioma nobo.

Pa esnan presente di habla Papiamento tabatin varios momento emocional cu tabata autoreflexion riba loke nan mes a pasa aden como mucha.

Na momento di entrega di e bul di doctorado na Joyce Pereira, su promotor directo, dr. Ronnie Severing, a expresa palabra di elogio na su persona como un profesional cu un personalidad perseverante y a elabora riba e ilustracion riba portada di e tesis, e mata ‘kibrahacha’, cu segun dr. Severing ta representa forsa di idioma Papiamento y di dr. Joyce Pereira mes.

Ta di aplaudi y ta un orguyo pa menciona cu aula di UOC tabata yena cu famia, amigo, colega, Papiamentologo y otro interesado. Di Gobierno di Aruba tabata presente Minister di Enseñansa, dr. Rudy Lampe y e parlamentarionan Sue-Ann Ras, Ricardo Croes y Michael Lampe. Di Corsou tabata presente Minister di Desaroyo Social, Labor y Bienestar, Hensley Koeyman.