Minister di Finanzas: CAFT kier sinta riba stoel di minister

ORANJESTAD – Gobierno su reaccion riba CAFT a bin den dos diferente tono. Por lo menos pa consumo publico. Gobierno a comenta riba e reaccion di CAFT su reaccion di e presupuesto supletorio 2018 e siman aki, unda cu e prome minister di Aruba a usa un tono mas ‘suave’ compara cu esun di minister di finanzas cu tabata uno mas directo y fuerte. Unda cu ambos ta complementa otro (e dos ministernan), ta cu CAFT ta co-culpabel pa e situacion financiero cu gobierno anterior a laga atras. Fuera di esey, e tono di e dos ministernan ta diferente. 

GOBIERNO TA TILDA CAFT DI FAYO

Tin cierto momentonan den nan reaccion cu ambos minister ta tilde CAFT di ta parti di e problema. Segun premier Evelyn Wever, mitar di e gobernacion anterior di 8 aña tabata ‘bou di supervision di CAFT’. “Gobierno anterior a faya y CAFT a faya” Wever a bisa. Anto tambe na final di su mensahe, Wever ta sigura cu e situacion ta algo netamente local y cu nos mes mester resolve esaki y no instancianan manera CAFT.” Aruba ta di nos y nos mester coregi e desaster aki” Wever a bisa.  Minister di finanza Xiomara Ruiz Maduro a bay mas leu, indicando cu CAFT su tono a cambia cu cambio di dos miembro di e colegio. Y directamente ta bisa cu gobierno no ta comparti opinion di CAFT.  “Nos no ta concuri cu opinion di CAFT” Ruiz a bisa directamente. Pero e no a keda eynan. “Bou di wowo di CAFT cos a bay krom’, y “CAFT kier sinta riba stoel di minister” tabata declaracionan mas fuerte di e mandatario contra e colegio di supervision financiero CAFT. A mustra cu te hasta Hulanda a bay di acuerdo cu cierto parti di e solucion cu awe CAFT kier critica, cu ta e fondo di crisis social. 

REACCION WEVER

En general sinembargo y riba liñanan grandi, Wever a reacciona mas diplomatico riba e tema. “Nos a hereda un desastre financiero cu deficit di riba 300 miyon. Nos a baha esaki pa fin di 2017 na 155 miyon, pa 2018 na 149 miyon, pa 2019 na 25 miyon. Un ehercicio grandi y dificil cu decisionnan structural, poniendo e ser humano central. Completamente diferente na decisionnan di 8 añanan anterior, di cual mitar bou di ‘supervision’ di Caft. Gobierno anterior a faya, Caft a faya” Wever a cuminsa na bisa. 

“ Awor tin un gobierno nobo cu un vision realistico y firme pa stabilisa y mehora nos situacion financiero. Tur esnan cu a crea e desaster, keda calmo, hala un banda, sinta trankil y mira nos coregi e rumbo equiboca cu boso a hinca nos pais aden. Tur esnan cu - mescos cu nos - NO a crea e desaster, ban lora manga y sigi traha. Aruba ta di nos y nos mester coregi e desaster aki. Den 1 aña nos no por coregi e desaster causa den 8 aña. Nos no por hasi milager. Pero nos ta riba e bon rumbo!” Wever a finaliza bisando. 

RUIZ MADURO

Ruiz Maduro a usa un tono (manera indica) mas directo unda cuminsa na tilda CAFT di a cambia di tono completamente, y ta atribui esaki na e yegada di dos miembro nobo, tanto esun di Aruba (Hellen van der Wal) como esun di Hulanda (Henk Kamp). Segun Ruiz, si gobierno di Aruba bay di acuerdo cu CAFT su ponencia, lo tin cu bay manda hende cas na december, locual no ta bay pasa. Ademas lo mester bay paga trahadonan mitar salario, y tur esaki pa cumpli cu e peticion di CAFT pa reduci 14.2 miyon mas di gastonan di personal prome cu e fin di aña aki ainda. E critica di CAFT pa cu e fondo apart di crisis social tampoco ta na su lugar segun Ruiz. Esaki pasobra segun Ruiz, CAFT no por tin un grip riba e fondo e ora. Ademas e peticion di CAFT pa usa tur fondo extra pa paga debe no ta corecto. Segun Ruiz, esey bo ta haci ora cu bo no tin un deficit, ya cu ora cu tin un surplus bo ta usa placa extra pa paga debe, pero no ora cu bo tin un deficit, manera cu bo tin awor. Lo traha cu bon concordancia cu Hulanda, pero ‘no por haci milager’ Ruiz a bisa. E ta considera cu e puntonan cu CAFT kier bin cu ne, irrealistico y cu asina CAFT kier ‘choca hende’. “Pero cos no ta bay asina” Ruiz a sigui bisa. Lesa e conseho di CAFT AKI.