AZV ta cera oficina na Playa pa 2 luna pa renobacion y cambia airco

ORANJESTAD – AZV su oficina principal na Playa lo cera pa dos luna pa renobacion y cambio di sistema di airco. Asina vocero Solange Tchong a bisa diaranson durante un conferencia di prensa. Entrante 3 di December 2018 te 31 di januari 2019 tur asegurado medico mester acudi na e oficina di Noord (MFA) of esun na San Nicolas pa servicio. Personal di esun di Playa lo reenforza e dos otro oficinanan mientrastanto. Segun Tchong, e oficina principal tin 8 aña sin un renobacion y a opta awor pa cera e oficina pa haci e trabounan aki. 

TEMPORADA

A scohe e temporada aki pasobra e ta un temporada no mucho ocupa pa AZV, cu ta permiti nan haci e cierre tambe. Tambe a mustra cu e impacto riba e cambio lo ta asina grandi cu no ta keda otro alternativa sino pa cera e oficina completamente. E intencion ta pa converti e oficina na Playa den uno mas eficiente y mas moderno pa tur cliente. Lo cuminsa obviamente na e parti di cliente y sigui bay patras. Esnan cu bishita e oficina despues, lo por tuma nota di e cambio grandi cu AZV lo implementa den e periodo nos dilanti.