Presupuesto 2019 a yega Parlamento porfin!

ORANJESTAD – Minister di Finanza Xiomara Ruiz Maduro a entrega e presupuesto 2019 na presidente di Parlamento Ady Thijsen diamars atardi. E hecho cu e entrega di presupuesto ta 2 luna y 3 siman laat (segun ley di comptabilidad e presupuesto di e siguiente aña mester ta entrega pa 1 di September di e aña anterior), ta debi cu mester a haci ehercicio riba e aspect di gasto di personal. Asina minister Ruiz a disculpa su mes na e presidente durante e entrega. Mester bisa si cu no ta prome biaha cu e presupuesto ta yega Parlamento laat. Den pasado esaki tabata un hecho caba, unda cu a logra di trata e presupuesto di e aña en cuestion, durante e aña respectivo. A mustra cu e presupuesto pa 2019 ta bin cu un deficit di 25 miyon, unda cu e entradanan ta monta pa 1419 miyon mientras cu e gastonan ta monta na 1428 miyon florin. Parlamento tin e fechanan di 10 pa 20 di December programa pa trata esaki. A mustra cu lo cuminsa duna parlamentarionan e presupuesto pa nan cuminsa haci nan trabou riba dje y manda nan preguntanan pa e respectivo ministernan. Potret ta un screenshot di e entrega via pagina di Facebook di gobierno.