Romero: Ta reuni cu varios grupo di taxista envez di un solo grupo

ORANJESTAD – Un reunion di dos ora entre minister di transporte Chris Romero y un grupo di 50 pa 60 taxista diamars atardi mester a trece claridad pa e grupo di taxista di mas edad. Un reunion cu tabata motibo di preocuacion di un grupo di 300 taxista cu no a haya un invitacion pa e reunion aki. Como tal esaki a crea  confusion pa cu e meta di e reunion. Principalmente pakico ta un grupito so a keda invita y no a grupo completo di 450 taxista, manera cu NoticiaCla a raporta anteriormente. 

REDO

E mandatario a clarifica diamars cu ta den grupo grupo e taxistanan lo wordo yama pa e reunion di informacion. “Informacion cu no sali di mi boca, ta redo” Romero a bisa na final di e reunion diamars, refiriendo na informacion incorecto cu lo tin eyfo. Y como tal a usa e momento aki pa suministra tur informacion corecto na e grupo di taxista presente. 

INFORMACION

E mandatario a mustra cu e reunion a bay den bon esfuera, y cu tur pregunta a keda contesta. A mustra cu e intencion tabata pa e prome grupo invita, ta e grupo di taxistanan di mas edad, ya cu nan merece e respet ey. A splica e posicion riba otorgamento di permiso, mas specific e parti di pasa permiso pa otro y si esaki ta posibel. E mandatario a sigura cu e permisonan otorga, ta keda di gobierno. Un persona di edad cu ta core taxi, por usa e facilidad di laga un ‘hulpchauffeur’ core e ultimo dos añanan di e persona su trayectoria, pa despues e persona entrega e permiso bek na gobierno. Esaki ta si e no tin yiu of familiar pa pasa e permiso pe. 

OTRO GRUPONAN

A splica cu contrario na pensamento eroneo, tur grupo di taxista lo wordo invita pa e reunionan aki, unda cu awor lo invita un grupo di taxista di 50 pa 65 aña. E grupo di diamars tabata forma parti di 12% di e cantidad total, y asina poco poco tur e gruponan lo haya atencion di e mandatario. E no a bisa nada di e hecho cu un grupo di entre 300 taxista no a wordo invita, ni riba e hecho cu e grupo aki a mustra nan malcontento pa medio di un carta na e mandatario. E mandatario nunca no a reacciona riba e carta aki, segun e vocero di e grupo di taxista, Linda Orman a sigura e portal aki diamars mainta. Consecuentemente a conseha e grupo aki pa no atende e reunion aki.