TAS A1 Blue Diamond y ATC Professional Taxi a dicidi conhunto pa no atende reunion

ORANJESTAD – E taxistanan di TAS A1 Blue Diamond y  ATC Professional Taxi (un grupo di mas of menos 300 taxista a a dicidi conhunto pa no atende e reunion awe tardi cu minister di transporte Chris Romero. E motibo ta pasobra te cu awe mainta ainda nan no ta haya un invitacion formal. Un grupo di menos di 100 persona lo a keda invita. Asina vocero di e grupo, Linda Orman a bisa NoticiaCla diamars mainta. “Anos ta conseha nos coleganan pa no bai y warda pa minister informa nos tur di su maneho” Orman a bisa. E sistema no mester ta cu ta informa uno si y e otro no. Nan a informa minister cu si no haya invitashon e reunion ta considera cancela.

CARTA

Manera NoticiaCla a raporta anteriormente, TAS A1 Blue Diamond y  ATC Professional Taxi , diadomingo a manda un carta pa minister di transporte Chris Romero. Den e carta, nan ta expresa nan disgust pa e hecho cu nan no a keda invita pa un reunion e siman entrante riba cambio di maneho nobo. E mandatario a invita taxistanan pa un reunion diamars awor, pero ta parse cu e dos gruponan menciona, no a haya invitacion. Esaki a causa disgusto cerca e taxistanan. 

INVITACION 

“Te cu e fecha di awe ningun TAS A1 Blue Diamond y  ATC Professional Taxia risibi un invitashon” Orman a bisa e taxistananden e carta cu NoticiaCla a pone su man ariba. “ E ta falta di etica y respet cu Minister C. Romero ta bai informa su maneho lagando mayoria afor di e reunion aki” Orman a sigui bisa. Nan a informa e mandatario mes momento cu sea e mandatario ta cancela e reunion cu esnan cu a risibi e invitashon of ta invita Taxi centraalnan i Taxi Unie cu ta representa e mayoria di Taxi chauffeur.” Motibo ta cu un maneho nobo ta pa tur 450 Taxista sea cu ta afilia na Taxi centraal, firmante serka Taxi Unie of Taxi individual”. E carta ta finalisa bisando “Nos ta asumi cu si Taxi Centraalnan y Taxi Unie no risibi un invitashon ta cu e reunion di November 20 ta wordo cancela”. Te cu awe mainta, no tabatin ningun invitacion.