Aruba menos generoso financieramente pa evento Crossing for Hope

Aruba menos generoso financieramente pa evento Crossing for Hope

Posted on 11/19/2018 11:51 am AST | Updated on 11/19/2018 12:01 pm AST

ORANJESTAD – Na januari 2010, Aruba tabata hopi generoso pa un bon causa y a duna 1.3 miyon florin pa esnan damnifica di e temblor di e isla di Haiti e aña ey. Ocho aña despues, pa un evento local grandi, cu e meta honra pa fondo pa Wilhelmina Kanker Fonds, Aruba no a logra di recauda ni 100 mil florin ( mitar di e meta di 200 mil cu a pone pa recauda). Siman pasa henter e isla a biba cu e momento emocional cu e 5 landadornan Gwendolin Kock, Deaxo Croes, Romar Arendsz, Davy Bisslik y Stephan Thijsen, pero esaki no a traduci na e generosidad financiero lamentablemente cu nos a wak 8 aña prome. Berdad cu e causa y acto tabata diferente. Pero hecho ta keda cu organisadornan no a logra recauda ni mitar di e suma aki.  Ora cu e portal aki a tuma nota di e resultado pober aki, a dicidi di trece esaki na luz di dia y wak si por genera mas placa ainda pa e fundacion aki. 

HAITI

Haiti a conoce un acto di naturalesa teribel cu enberdad a laga e isla destrui. Aruba tabata generoso, y a logra recauda 1.3 miyon florin localmente. Cu e placa ey, a usa 100 mil pa asistencia directo y 1.2 pa traha dos scol, cu awendia ta operacional. E causa tabata pa algo internacional, y Aruba a duna na grandi. Un bunita suma, impresionante, cu a haya un lugar special pa e isla pober di Haiti. Potretnan despues a mustra e resultado di Aruba su generosidad e tempo ey, unda cu a mira kico e placa a produci. El a mustra cu Aruba tabata generoso, aunke ta trata algo internacional y desconoci pa nos. Pero ocho aña despues, e generosidad aki, parse di no tey mas. Kico cu e motibo por ta, ta keda un hecho cu esaki no ta mescos. 

ARUBA

E actividad local siman pasa tabata uno nacional, y no internacional manera esun di Haiti. Siman pasa e 5 landadonan di Aruba a practicamente sacrifica nan bida pa recauda fondo pa Wilhelmina Kanker Fonds, cruzando e laman entre Venezuela pa Aruba. Pero e evento a logra apenas recauda 60 mil florin. E suma a keda confirma dialuna mainta pa e presidente di e fundacion, Lily Prince pa NoticiaCla ora cu e portal a acerca e presidente pa un update. E evento recien berdad a uni Aruba grandemente, y no tabatin palabra pa splica emocionnan cu e pueblo a sinti. Lamentablemente el a keda solamente na emocion y no na recaudacion. E ta cuestiona e hecho cu pa un evento internacional, nos por recauda mas di un miyon den un solo dia, pero pa un evento nacional local, unda cu 5 hoben ta logra un hazaña pa un fundacion cu ta traha pa nos isla, Aruba no por a duna mas. 

SITUACION TA MALO?

E situacion di Aruba 8 aña despues ta mas malo awendia cu e generosidad a baha? Hendenan no ta mes generoso? Of no tabatin suficiente promocion of logistica pa por colecta e suma di placa. E fundacion y e organisadornan di evento a pone nan meta na 200 mil florin. Ni mitar di esey a wordo logra. Por ta si e structura logistico tabata diferente, por a logra colecta mas? Kico cu e motibo por ta,  e ta algo cu hopi ta cuestiona y tin ta te hasta condena, y ta lamenta profundamente. Algun a bisa cu nos isla a para bira un isla di limosnero unda cu cada scol, fundacion y organisacion mester subi caya pa colecta placa, pa nan por opera y funciona. Hopi ta mustra cu cos ta malo y cu pesey no por ta asina generoso. Di otro banda, ta mira hende ta fiesta, goza y gasta placa na nan antoho, y e isla no ta duna ningun indicacion cu nos tin crisis. Ta conoci tambe si cu ta prerogrativo di cada ciudadano con ta gasta su placa y na kico. Pero esey no ta kita afor, cu nos por haci mas. 

GASTONAN

Prince a splica e portal aki cu na 2017 durante nan recaudacion annual di april, nan a recauda 35 mil florin. E aña aki esaki a subi berdad te na 75 mil florin. Pero si analisa e situacion financiero di e fundacion, e ta leu di ta suficiente. Esaki si tene na cuenta cu di januari pa awor, e gastonan pa thuiszorg pa e pashentnan, ta riba 100 mil florin caba. Y KWF ta opera exclusivamente di donacion. Aruba tin 2 siman pa genera e fondonan necesario pa aporta na e causa aki y sikiera yega e suma necesario. Ban mustra cu nos por y nos tin e sentimento pa aporta na yuda cu asistencia pa un malesa cu gran parti di nos isla ta envolucra cu ne, esta cancer. Ban mustra e landadornan Gwendolin Kock – Croes, Deaxo Croes, Romar Arendsz, Davy Bisslik y Stephan Thijsen cu nan no a landa pornada. Esnan cu kier haci un donacion ainda, por haci esaki riba e siguiente cuentanan bancario CMB # 60078005,  Banco di Caribe # 80710901 y Aruba Bank # 2611450190. Por haci esaki te fin di luna y por fabor pone e nomber Crossing for Hope. 

  • Powered by SETAR