Taxi Unie y Taxi Centralnan disgusta cu minister Chris Romero

ORANJESTAD - Taxi Unie y Taxi Centraalnan (un grupo grandi di taxista na Aruba diadomingo a manda un carta pa minister di transporte Chris Romero. Den e carta, nan ta expresa nan disgust pa e hecho cu nan no a keda invita pa un reunion e siman entrante riba cambio di maneho nobo. E mandatario a invita taxistanan pa un reunion diamars awor, pero ta parse cu e dos gruponan menciona, no a haya invitacion. Esaki a causa disgusto cerca e taxistanan. 

INVITACION 

“Te cu e fecha di awe ningun Taxi-centraal i ni Taxi Unie a risibi un invitashon” vocero di e grupo Linda Orman a bisa den e carta cu NoticiaCla a pone su man ariba. “ E ta falta di etica y respet cu Minister C. Romero ta bai informa su maneho lagando mayoria afor di e reunion aki” Orman a bisa. Nan a informa e mandatario mes momento cu sea e mandatario ta cancela e reunion cu esnan cu a risibi e invitashon of ta invita Taxi centraalnan i Taxi Unie cu ta representa e mayoria di Taxi chauffeur.” Motibo ta cu un maneho nobo ta pa tur 450 Taxista sea cu ta afilia na Taxi centraal, firmante serka Taxi Unie of Taxi individual”. E carta ta finalisa bisando “Nos ta asumi cu si Taxi Centraalnan y Taxi Unie no risibi un invitashon ta cu e reunion di November 20 ta wordo cancela”. No ta conoci pa e portal aki pakico e dos gruponan aki no a keda invita.